ویب ڈیسک: ملک میں 62فیصد تک معمول سے بارشوں کے باعث خشک سالی کا الرٹ جاری کردیاگیا۔
محکمہ موسمیات کے مطابق یکم ستمبر 2024سے 21مارچ 2025تک معمول سے 40فیصد کم بارشیں ہوئیں جبکہ سندھ میں 62 فیصد اور بلوچستان میں معمول سے 52فیصد کم بارشیں ریکارڈ کی گئیں۔
محکمہ موسمیات کا کہنا ہے کہ تربیلا اور منگلا ڈیموں میں پانی کی شدید قلت ہے جبکہ رواں سال مارچ میں جنوبی علاقوں میں اوسط درجہ حرارت معمول سے 2 سے 3 ڈگری زیادہ ہے۔
محکمہ موسمیات نے بتایاکہ پنجاب میں معمول سے 38 فیصد، خیبرپختونخوا میں 35فیصد اور آزاد کشمیر میں معمول سے 29 فیصد کم بارشیں ہوئیں جس کے باعث خشک سالی کا خطرہ بڑھ گیا ہے ۔
مزید بتایاگیا کہ حالیہ بارشوں سے وسطی اور بالائی علاقوں میں خشک سالی کی صورتحال بہترہوئی، سندھ، بلوچستان کے جنوبی حصوں اور پنجاب کے مشرقی میدانی علاقوں میں خشک سالی برقرار ہے۔
محکمہ موسمیات نے بتایاکہ کچھ جنوبی علاقوں میں مسلسل خشک دنوں کی تعداد 200 سے بھی تجاوزکرچکی ہے، خشک سالی سے متاثرہ علاقوں میں صورتحال مزید بگڑسکتی ہے۔
