ویب ڈیسک: اقوام متحدہ نے غزہ میں اپنی عمارت پر حملے کا ذمہ دار اسرائیل کو ٹھہرا دیا، گزشتہ ہفتے غزہ کے علاقے دیر البلح میں اقوام متحدہ کے ہیڈکوارٹر پر مبینہ طور پر اسرائیلی حملے کے نتیجے میں اقوام متحدہ کا ایک غیر ملکی اہلکار ہلاک اور 5 دیگر شدید زخمی ہوئے تھے۔
صیہونیوں نے غزہ کے علاقے دیر البلح میں اقوام متحدہ کی کسی بھی عمارت پر حملے کے الزامات مسترد کرتے ہوئے کہا تھا کہ میڈیا ادارے غیر مصدقہ رپورٹس پر ذمہ داری کا مظاہرہ کریں، تاہم اب باضابطہ طور پر غزہ میں اپنی عمارت پر حملے کا ذمہ دار یونائیٹڈ نیشن نے اسرائیل کو ٹھہرا دیا۔
اقوام متحدہ کا کہنا ہے کہ غزہ میں گزشتہ ہفتے ہیڈکوارٹر پر ہونے والا حملہ، جس میں ایک ملازم ہلاک اور متعدد زخمی ہوئے، اسرائیلی ٹینک کے ذریعے کیا گیا تھا۔اس حوالے سے یو این سیکرٹری جنرل کے ترجمان سٹیفن دوجارک نے تصدیق کرتے ہوئے کہا کہ دستیاب معلومات کی بنیاد پر 19 مارچ کو دیر البلح میں اقوام متحدہ کے کمپاؤنڈ کو نشانہ بنانے والے حملے اسرائیلی ٹینک کی جانب سے کیے گئے تھے۔
یہ بیان ایسے وقت میں سامنے آیا ہے کہ جب اقوام متحدہ نے فلسطینی علاقے میں اپنے غیرملکی عملے کو عارضی طور پر کم کرنے کا فیصلہ کیا ہے۔ یاد رہے کہ اسرائیل کی جانب سے گزشتہ ہفتے دوبارہ حملے شروع کرنے کے بعد سے غزہ میں تقریباً 700 فلسطینی شہید ہوچکے ہیں۔
