ویب ڈیسک: آئی جی خیبرپختونخوا ذولفقار حمید نے خیبرپختونخوا پولیس کی تنخواہیں بلوچستان کے برابر کرنے کیلئے وزیراعلیٰ کو مراسلہ ارسال کر دیا ہے۔ مراسلہ میں دونوں صوبوں کی پولیس کی تنخواہوں کے مابین فرق واضح کیا گیا ہے۔
جاری دستاویز کے مطابق آئی جی بلوچستان کی ماہانا تنخواہ خیبر پختونخوا کے آئی جی سے 3 لاکھ 69 ہزار 498 روپے، جبکہ ایس پی بلوچستان کی تنخواہ پختونخوا کے ایس پی سے 2 لاکھ 21 ہزار 196 روپے زیادہ ہے۔ دونوں صوبوں کے ایس ایس پی اور اے آئی جی کی تنخواہوں میں 2 لاکھ 81 ہزار 177 روپے، جبکہ ڈی آئی جی کی تنخواہ میں 3 لاکھ 6 ہزار 474 روپے کا فرق ہے۔
جاری دستاویزات میں بتایا گیا ہےکہ خیبرپختونخوا اور بلوچستان کے ایڈیشنل آئی جی کی تنخواہ میں 3 لاکھ 22 ہزار 309 روپے، بلوچستان میں کانسٹیبل کی تنخواہ 69 ہزار 885 روپے جبکہ کے پی پولیس کانسٹیبل کی تنخواہ 69 ہزار127 روپے ہے، پنجاب اور سندھ کے پولیس اہلکاروں اور افسران کی تنخواہیں بھی زیادہ ہیں۔
آئی جی خیبرپختونخوا ذولفقار حمید کی جانب سے وزیراعلیٰ کو خط ارسال کر دیا گیا ہے، جس میں مطالبہ کیا گیا ہے کہ خیبرپختونخوا پولیس نے دہشتگردی کے خلاف بہت قربانیاں دی ہیں، خیبرپختونخوا کو ‘ہارڈ ایریا’ قرار دے کر پولیس کی تنخواہیں بلوچستان پولیس کی طرز پر بڑھائی جائیں۔
