ویب ڈیسک: حکومت نے چیئرمین پیپلز پارٹی بلاول بھٹو زرداری کی ثالثی کی پیشکش قبول کرتے ہوئے پی ٹی آئی سے بات کرنے کی ذمہ داری انہی کو دے دی ۔
نجی ٹی وی چینل سے گفتگو کرتے ہوئے وزیراعظم شہباز شریف کے مشیر رانا ثناء اللہ نے کہا کہ بلاول بھٹو نے تحریک انصاف سے بات کرنے کی پیشکش کی تھی جس پر حکومت نے ان کی پیش کش کو قبول کرتے ہوئے انہیں بات کرنے کی ذمہ داری تفویض کردی ۔
رانا ثنا اللہ کا کہنا تھا کہ اگر بلاول بھٹو زرداری تحریک انصاف سے اجلاس میں شرکت کی یقین دہانی حاصل کرلیں تو قومی سلامتی کمیٹی کا اجلاس دوبارہ بلانے میں کوئی حرج نہیں ہے۔
مشیر وزیراعظم نے مزید کہا کہ بلاول بھٹو زرداری خود حکومت میں ہیں اگر پی ٹی آئی اور حکومت کے درمیان مذاکرات میں کامیاب ہوجاتے ہیں تو یہ ہماری ہی کامیابی ہوگی۔
رانا ثنا ء کا کہنا تھا کہ پیکا قانون کی ضرورت ہے ، اس کے غلط استعمال کی شکایت بھی جائز ہے ، اس پر بیٹھ کر بات ہونی چاہیے ۔
