ویب ڈیسک: اسرائیلی میڈیا کی جانب سے پاکستانی وفد کے رواں ماہ اسرائیل کے دورے کی تصدیق کردی گئی ۔
اسرائیلی میڈیا کے مطابق رواں ماہ اسرائیل کا دورہ کرنے والے پاکستانیوں کے دفد میں صحافی، دستاویزی فلمساز اور سول سوسائٹی کے رہنما شامل تھے،وفد نے اسرائیل کے ہولوکاسٹ میوزیم اور 7 اکتوبر 2023 کے حملوں کے مقامات اور دیگر جگہوں کا دورہ کیا۔
میڈیا رپورٹ کے مطابق دورہ شراکہ نامی ایک غیر منافع بخش تنظیم نے ترتیب دیا، جو مشرق وسطی میں مکالمے اور بقائے باہمی کو فروغ دینے کیلئے کام کرتی ہے، اس پروگرام کا مقصد عرب اور مسلم دنیا میں رواداری کو فروغ دینا تھا۔
وفد میں شامل پاکستانی صحافی سبین آغا کا کہنا تھا کہ دورے کا مقصد اسرائیلی ثقافت اور لوگوں کو سمجھنے کی کوشش کرنا تھا، اگر سعودی عرب جیسے ممالک اسرائیل کے ساتھ تعلقات کو بہتر کرتے ہیں تو پاکستان کیلئے بھی یہ آسان ہو سکتا ہے۔
پاکستانی وفد کے دورہ اسرائیل پر دفتر خارجہ کے ترجمان نے ردعمل دیتے ہوئے کہا تھا کہ تاحال تصدیق نہیں ہوئی کہ وفد کے ارکان نے کس پاسپورٹ پر اسرائیل کا سفر کیا ہے۔
دفتر خارجہ کا کہنا تھاکہ پاکستان کا اسرائیل کو تسلیم نہ کرنے کا موقف تبدیل نہیں ہوا۔
ترجمان دفتر خارجہ نے مزید کہا کہ پاکستان اور اسرائیل کے درمیان سفارتی تعلقات نہ ہونے کے باعث پاکستانی شہری اسرائیل کا سفر نہیں کرسکتے۔
