ویب ڈیسک: صوبائی دارالحکومت پشاور میں بادل برس پڑے، جس سے موسم خوشگوار ہو گیا، اور گرمی کے ستائے چہرے کھل اٹھے، جبکہ اس کے ساتھ ساتھ صوبہ خیبر پختونخوا کے بالائی علاقوں میں بھی بارش کا امکان ہے۔
محکمہ موسمیات نے ملک کے مختلف علاقوں میں گرج چمک کے ساتھ تیز بارش کی پیشگوئی کر دی، جس کے مطابق آج خیبرپختونخوا سمیت گلگت بلتستان، کشمیراور دیگر علاقوں میں بھی تیز ہواؤں، آندھی اور گرج چمک کے ساتھ تیز بارش کا امکان ہے جبکہ چند مقامات پر ژالہ باری بھی ہو سکتی ہے۔
محکمہ موسمیات نے انتباہ جاری کرتے ہوئے کہا ہے کہ 26 اور 27 مارچ کو آندھی، ژالہ باری اور تیز بارش کی وجہ سے کمزور انفراسٹرکچر کو نقصان پہنچنے کا اندیشہ ہے، ژالہ باری اور آندھی سے میدانی علاقوں میں کھڑی فصلوں کو نقصان بھی پہنچ سکتا ہے، جبکہ دوسری طرف پشاور میں بادل برس پڑے، جس سے موسم خوشگوار ہو گیا.
محکمہ موسمیات کی رپورٹ میںبتایا گیا ہے کہ شدید بارش کے باعث مری، گلیات، ناران، کاغان، چترال، دیر، سوات، کوہستان، مانسہرہ، ایبٹ آباد، شانگلہ، استور، ہنزہ، سکردو، وادی نیلم، باغ، پونچھ، حویلیاں میں لینڈ سلائیڈنگ اور پھسلن کی وجہ سے ٹریفک کی روانی میں خلل پیدا ہو سکتا ہے۔
