ویب ڈیسک: وفاقی حکومت نے بلوچستان میں کل سے ٹرین سروس کی بحالی کا اعلان کردیا ہے ۔
کوئٹہ میں پریس کانفرنس کے دوران وفاقی وزیر ریلوے حنیف عباسی نے ٹرین سروس کی بحالی کا اعلان کرتے ہوئے کہا کہ جعفر ایکسپریس کل پشاور سے کوئٹہ کے لیے روانہ ہوگی ۔
انہوں نے کہا کہ کوئٹہ سے جعفر ایکسپریس ٹرین سروس جمعہ کے روز سے چلائی جائیگی جبکہ مسافروں کو مکمل سکیورٹی فراہم کی جائیگی۔
پریس کانفرنس کے دوران وفاقی وزیر ریلوے نے نے کو ئٹہ سے کراچی کے لیے بولان میل بھی روزانہ کی بنیادپر چلانے کااعلان کیا۔
حنیف عباسی کا کہنا تھا کہ جعفر ایکسپریس پر حملے کا واقعہ بہت افسوسناک تھا، سکیورٹی اداروں نے فوری رسپانس دیا، خودکش بمباروں کو قابو کیا، یہ سکیورٹی فورسز کی کارروائی کی معراج تھی۔
ان کا کہنا تھا کہ ریلوے کے ڈی ایس اور پوری ٹیم کو لوگوں کو ریسکیو کرنے اور ٹریک کی بحالی پر خراج تحسین پیش کرتا ہوں۔
وفاقی وزیر کا کہنا تھا کہ ہمارے سکیورٹی کے ایشوزہیں، ریلوے اسٹیشنوں میں اسکینر نہیں ہیں، دیگر مسائل ہیں، ریلوے پولیس میں 500 لوگوں کی تعیناتی کی جائیگی اور اس کے علاوہ 1000لوگ بھرتی کریں گے۔
انہوں نے کہا کہ بلوچستان میں چلنے والی ٹرینوں کی تعداد کو 2003,2004کی پوزیشن پر لائیں گے، ان شا اللہ ہم نے مسافروں کو فول پروف سکیورٹی فراہم کرنی ہے۔
