ویب ڈیسک: خیبر پختونخوا میں امن و امان کی ابتر صورتحال کے باعث صوبائی دارالحکومت پشاور سمیت صوبہ بھر میں بیروزگاری مزید بڑھ گئی ۔
ذرائع کے مطابق ملٹی نیشنل کمپنیوں اور صنعتکاروں کے دوسرے صوبوں کو منتقل ہونے کے بعد پشاور سمیت خیبر پختونخوا میں بیروز گار میں اضافہ ہوگیا ہے، جس کی وجہ سے لوگوں کی روزمرہ زندگی انتہائی مشکلات کا شکار ہو گئی ہے ۔
شہریوں کا اس حوالے سے کہنا ہے کہ ایک طرف مہنگائی میں آئے روز اضافہ ہو رہا ہے تو دوسری جانب بے روزگاری بھی بڑھ رہی ہے، روزگار نہ ہونے کی وجہ سے گھر کا کرایہ، بجلی، گیس اور پانی کے بلز ادا کرنا مشکل ہو رہا ہے جبکہ بچوں کے سکولوں کی فیس اور دیگر اخراجات نے زندگی اجیرن کر دی ہے۔
شہریوں کے مطابق گزشتہ ایک سال میں ہر چیز کی قیمت دگنی ہو گئی ہے جب کہ آمدن میں کوئی اضافہ نہیں ہوا، شہر میں تعمیراتی کام نہ ہونے کے برابر ہے جس کے باعث مزدور در در کی ٹھوکریں کھانے پر مجبور ہیں۔
واضح رہے کہ خیبر پختونخوا میں بیروزگاری کی شرح 8.8فیصد ہے جو چاروں صوبوں کے مقابلے میں سب سے زیادہ ہے ۔
شہریوں نے موقف اپنایا کہ اگر مہنگائی کو کنٹرول نہ کیا گیا تو بیروزگاری کی شرح میں مزید اضافہ ہو سکتا ہے اگر صوبے میں بے روزگاری بڑھی تو جرائم کی شرح میں بھی اضافے کا خدشہ ہے۔
