ویب ڈیسک: بلوچستان سے معطل ٹرین سروس بحال ہو گئی، اس کے ساتھ ہی کوئٹہ سے پشاور کینٹ کیلئے جعفر ایکسپریس 17روز بعد روانہ ہو گئی۔ رکن صوبائی اسمبلی جمال شاہ کاکڑ نے ٹرین کو رخصت کیا۔
تفصیلات کے مطابق کوئٹہ سے پشاور کینٹ کیلئے جعفر ایکسپریس 17روز بعد روانہ کی گئی، 10 بوگیوں پر مشتمل ٹرین میں سوار 400 مسافر اپنی منزل کی جانب روانہ ہوئے ہیں، جبکہ پشاور سے روانہ ہونے والی جعفر ایکسپریس بھی کوئٹہ کی جانب محوِ سفر ہے۔
16 روز سے معطل ٹرین سروس 280 مسافروں کو لے کر جعفر ایکسپریس کوئٹہ کی جانب روانہ ہوئی تھی، یہاں سے وفاقی وزیر امیر مقام نے ٹرین کو روانہ کیا۔
مسافروں نے اپنے ٹرین کے سفر کو خوشگوار قرار دیتے ہوئے کہا کہ ملک سے دہشت گردی کا جڑ سے مکمل طور پر خاتمہ ہونا چاہیے۔
یاد رہے 11 مارچ کو کالعدم بی ایل اے نے جعفر ایکسپریس پر حملہ کرکے مسافروں کو یرغمال بنالیا تھا، سیکیورٹی فورسز نے 2 روز آپریشن کرکے تمام دہشت گردوں کو ہلاک کر دیا۔
