ویب ڈیسک: مشیر اطلاعات خیبر پختونخوا بیرسٹر ڈاکٹر سیف نے کہا ہے کہ کرم میں قیامِ امن کیلئے وزیرِاعلیٰ خیبرپختونخوا کے اقدامات رنگ لا رہے ہیں، کرم میں راستوں کو مزید محفوظ بنانے کے لیے فریقین کے درمیان معاہدہ طے پایا ہے۔
انہوں نے کہا کہ یہ معاہدہ کوہاٹ امن جرگے کے بڑے معاہدے کے تحت ایک ذیلی معاہدہ ہے-اس معاہدے کا بنیادی مقصد ٹل پاراچنار شاہراہ کو محفوظ بنانا ہے۔
صوبائِی مشیر اطلاعات کے مطابق وزیرِاعلیٰ کی قیادت میں خیبر پختونخوا حکومت صدی سے زائد پرانے تنازعہ کے مستقل حل کی جانب تیزی سے پیش رفت کر رہی ہے، کوہاٹ امن معاہدے کے تحت کرم کو بنکرز اور اسلحے سے پاک کیا جا رہا ہے، دونوں فریقین کے تقریباً 900 بنکرز اب تک مسمار کیے جا چکے ہیں۔
بیرسٹر ڈاکٹر سیف نے کہا کہ بنکرز کی مسماری کے بعد اسلحہ جمع کرانے کا عمل شروع کیا جائے گا، ضلع کرم میں مستقل قیامِ امن کیلئَے بنکرز اور اسلحے کا خاتمہ ناگزیر ہے، اسی لیے تمام تر معاملات کی نگرانی وزیرِ اعلیٰ علی امین گنڈاپور خود کر رہے ہیں- بیرسٹر ڈاکٹر سیف نے کہا ہے کہ کرم میں قیامِ امن کیلئے وزیرِاعلیٰ خیبرپختونخوا کے اقدامات رنگ لا رہے ہیں، کرم میں راستوں کو مزید محفوظ بنانے کے لیے فریقین کے درمیان معاہدہ طے پایا ہے۔
