ویب ڈیسک: اسرائیلی افواج کی بربریت اور وحشیانہ بمباری کا سلسلہ جاری ہے، عید کے ان پرمسرت دنوں میں بھی صیہونی ظلم و ستم پورے عروج پر ہے، حالیہ واقعات میں عیدالفطر کے دوسرے روز بچوں سمیت مزید 64فلسطینی شہید جبکہ متعدد زخمی ہو گئے ہیں۔
تفصیلات کے مطابق غزہ میں عیدالفطر کے دوسرے روز بھی فلسطینیوں پر اسرائیلی فوج کے حملے جاری رہے، ان حملوں میں بچوں سمیت مزید 64فلسطینی شہید اور درجنوں زخمی ہوگئے، غزہ کے جنوبی علاقے پر اسرائیلی حملے میں تین افراد، خان یونس پر حملے میں 6 فلسطینی شہید اور متعدد افراد زخمی ہوئے ہیں۔ فلسطینی حکام کے مطابق رفاح کے قریب اسرائیلی فائرنگ کے ایک ہفتے بعد 14 لاشیں برآمد ہوئیں، جن میں طبی عملے کے 8 ارکان، 5 شہری دفاع اور ایک یو این ملازم کی نعش شامل ہے۔
یاد رہے کہ 2023 سے جاری اس کشت و خون میں شہدا کی مجموعی تعداد 50 ہزار سے تجاوزکر گئی، جبکہ اس دوران ایک لاکھ سے زائد فلسطینی زخمی بھی ہوئے ہیں۔ فرانسیسی صدر میکرون نے اسرائیلی وزیراعظم نیتن یاہو سے ٹیلی فونک رابطہ کر کے غزہ پر حملے بند کرنے کا مطالبہ کیا، اور اس کے ساتھ ہی انہوں نے فوری جنگ بندی معاہدے پر بھی زور دیا ہے.
