ویب ڈیسک: وزیراعظم شہباز شریف نے کہا ہے کہ بلوچستان کی ترقی اولین ترجیحات میں شامل ہے، صوبہ کی ترقی کیلئے وفاق ہر ممکن تعاون فراہم کرے گا۔
وزیراعظم شہباز شریف سے وزیر اعلیٰ بلوچستان سرفراز بگٹی نے ملاقات کی، اور وزیر اعلیٰ بلوچستان نے وزیراعظم کو عید الفطر کی مبارک باد بھی دی۔ اس موقع پر دونوں رہنماؤں نے بلوچستان کی موجودہ اقتصادی، سماجی اور امن وامان کی صورتحال پر تبادلہ خیال کیا۔
وزیراعظم سے میر سرفراز بگٹی کی ملاقات کے دوران وفاقی حکومت کی جانب سے بلوچستان کے لیے جاری ترقیاتی منصوبوں پر بھی تفسیلی بات چیت کی گئی، اور وزیراعلیٰ بلوچستان سرفراز بگٹی نے وزیراعظم کو صوبے کی ترقی کے حوالے سے موجودہ منصوبوں کی پیشرفت سے تفصیلی طور پر آگاہ کیا۔
ملاقات کے دوران وزیراعظم نے اس بات کا اعادہ کیا کہ بلوچستان کی ترقی اولین ترجیحات میں شامل ہے، اس مقصد کے لیے وفاق کی جانب سے تمام تر ضروری اقدامات کیے جائیں گے۔
