ویب ڈیسک: بانی پی ٹی آئی سے وزیراعلیٰ خیبرپختونخوا کی ملاقات کی اندرونی کہانی سامنے آ گئی، عمران خان نے علی امین گنڈاپور کو وزراء کے خلاف کارروائی کرنے کا اختیار دے دیا۔
ذرائع کے مطابق علی امین گنڈا پور نے بانی پی ٹی آئی کو صوبے میں تنظیم سازی سے متعلق شکایت کی اور کہا عاطف خان اور شیر ارباب کو آپ کے کہنے پر ہی عہدوں سے ہٹایا گیا تھا، اب انہیں دوبارہ شامل کیا گیا ہے۔
سابق وزیراعظم نے کہا کہ اس معاملہ پر متعلقہ قیادت سے پوچھوں گا، ملاقات کے دوران وزیراعلیٰ خیبرپختونخوا نے دو وزراء کی کارکردگی سے متعلق بانی پی ٹی آئی کو شکایت کی، اور انہیں اس حوالے سے مکمل تفصیل بیان کی۔
بانی پی ٹی آئی عمران خان نے علی امین گنڈاپور کو وزراء کے خلاف کارروائی کرنے کا اختیار دے دیا، دونوں وزراء کو کابینہ سے ہٹانے یا ان کے قلم دان تبدیل کرنے کا امکان بھی طاہر کیا جانے لگا ہے۔
چیئرمین پاکستان تحریک انصاف بیرسٹر گوہر نے بھی علی امین گنڈا پور سے ملاقات کی، اور پارٹی ٹکٹوں سے متعلق گنڈاپور کے بیان پر تشویش کا اظہار کیا، اور اس صورتحال کے حوالے سے مستقبل میں خاموش رہنے اور اختلافات پارٹی کے اندر رکھنے کا مشورہ دیا۔
