ویب ڈیسک: الیکشن ایکٹ میں ترامیم اور پی ٹی آئی کو مخصوص نشستیں نہ دینے سے متعلق کیس سماعت کیلئے مقرر کر دیا گیا ہے۔
تفصیلات کے مطاق پی ٹی آئی کو مخصوص نشستیں نہ دینے اور الیکشن ایکٹ میں کی گئی ترامیم کے خلاف درخواست پر لاہور ہائیکورٹ 7 اپریل کو سماعت کرے گی۔ ایڈووکیٹ منیر احمد کی دائر کردہ درخواست پر لاہور ہائی کورٹ کے جسٹس خالد اسحاق سماعت کریں گے۔
دائر کی گئی درخواست میں درخواست گزاروں نے مؤقف اختیار کیا ہے کہ الیکشن ایکٹ میں کی گئی ترامیم آئین کے منافی ہیں، جن کی وجہ سے پاکستان تحریک انصاف کو مخصوص نشستیں نہیں دی گئیں، حالانکہ سپریم کورٹ ان نشستوں کی فراہمی کے حوالے سے واضح فیصلہ دے چکی ہے۔
عدالت نے وفاقی حکومت کے وکیل کو آئین کے آرٹیکل 27-اے کے تحت نوٹ جمع کرانے کی ہدایت کر رکھی ہے، جبکہ امریکی نژاد سید اقتدار حیدر کی فریق بننے کی درخواست بھی منظور کر لی گئی ہے۔
پاکستان تحریک انصاف کو مخصوص نشستیں نہ دینے سے متعلق عدالت میںدائر درخواست میں سید اقتدار حیدر کی جانب سے مؤقف اختیار کیا گیا ہے کہ فریق نمبر 12، یعنی پیپلز پارٹی پارلیمنٹرین، الیکشن کمیشن میں کوما کے ساتھ نہیں، بلکہ پاکستان پارلیمنٹیرینز کے طور پر رجسٹرڈ ہے، اس لیے اسے غلط فریق بنایا گیا ہے۔
عدالت کی جانب سے رجسٹرار آفس کو سید اقتدار حیدر کے تحریری دلائل کو مرکزی درخواست کا حصہ بنانے کی ہدایت بھی جاری کی گئی ہے۔ علاوہ ازیں وکیل اظہر صدیق نے عدالت سے استدعا کی کہ سپریم کورٹ کے فیصلے پر عملدرآمد کرانے سمیت الیکشن ایکٹ میں کی گئی ترامیم کو کالعدم قرار دیا جائے۔
