ویب ڈیسک: خیبرپختونخوا میں 73 آپریشنز کے دوران 158 دہشتگرد ہلاک کئے گئے ہیں، جبکہ اس دوران دہشت گردوں کے قبضہ سے بھاری اسلحہ برآمد کیا گیا ہے۔
تفصیلات کے مطابق دہشت گردوں کے خلاف صوبہ خیبرپختونخوا کے 15 مختلف اضلاع میں 73 آپریشنز کیے گئے، اس دوران 158 دہشتگرد مارے گئے، مارچ کے مہینے میں ہونے والے آپریشنز کے دوران سب سے زیادہ 40 دہشت گرد شمالی وزیرستان میں ہلاک ہوئے، جبکہ دیگر علاقوں میں بھی شرپسندوں کیخلاف سخت کارروائیاں کی گئیں۔
ان کارروائیوں کے دوران ضلع ڈیرہ اسماعیل خان میں 25، مہمند میں 20، بنوں اور مردان میں 18، 18 دہشت گرد ہلاک ہوئے۔ جنوبی وزیرستان میں 13، لکی مروت میں 7، باجوڑ میں 6، خیبر میں 4، کرک اور ٹانک میں 2، 2، چارسدہ، سوات، ہنگو اور پشاور میں ایک، ایک دہشت گرد مارا گیا۔
اس حوالے سے جاری ہونیوالی رپورٹ میں بتایا گیا ہے کہ ان ہلاک ہونے والے دہشت گردوں سے 123 ایس ایم جی، 29 راکٹ لانچر اور 9 مشین گن برآمد کئے گئے.
