ویب ڈیسک: پی ٹی آئی میں اختلافات سنگین صورت اختیار کر گئے ، اسد قیصر اور شہرام ترکئی کے بعد عاطف خان بھی وزیراعلیٰ گنڈا پور کے متنازع انٹرویو پر بول پڑے ۔
ذرائع کے مطابق وزیراعلیٰ علی امین گنڈا پور کے سوشل میڈیا انٹرویو پر پارٹی میں ایک بار پھر اختلافات کھل کر سامنے آگئے ہیں اور اور شہرام ترکئی کے بعد عاطف خان نے بھی علی امین گنڈا پور کے بیان کی تحقیقات کا مطالبہ کیا ہے۔
پاکستان تحریک انصاف کے رہنما اور ممبر قومی اسمبلی عاطف خان کا کہنا ہے کہ اگر بانی پی ٹی آئی عمران خان نے ہمارے متعلق کوئی بیان دیا ہے تو اس کی تصدیق ہونی چاہیے۔
عاطف خان نے کہا کہ وزیر اعلیٰ خیبرپختونخوا علی امین گنڈا پور کا میرے ساتھ اختلاف ہے تو صحیح ہے لیکن اسد قیصر اور شکیل خان سمیت سینئر رہنمائوں کے خلاف باتیں نہیں ہونی چاہئیں تھیں۔
سابق صوبائی وزیر نے کہا کہ وزیراعلیٰ خیبرپختونخوا کو صوبے کی گورننس اور امن و امان پر توجہ دینی چاہیے اور بانی پی ٹی آئی کی رہائی کی کوششوں کو کمزور نہیں کرنا چاہیے، اگر عمران خان نے ہمارے خلاف کوئی بیان دیا ہے تو اس کی تصدیق ہونی چاہیے۔
گزشتہ روز پی ٹی آئی کے رکن قومی اسمبلی شہرام ترکئی نے مرکزی قیادت سے وزیراعلی کے پی علی امین گنڈا پور کے بیان کی تحقیقات کا مطالبہ کرتے ہوئے کہا تھا کہ ایسے بیانات سے بانی پی ٹی آئی کی تحریک کو نقصان پہنچے گا، وزیراعلی اپنی توانائیاں امن و امان کی بحالی اور گڈ گورننس پر مرکوز رکھیں۔
شہرام ترکئی نے مزید کہا کہ علی امین گنڈاپور نے پارٹی کے بعض رہنماں پر سازشوں کا الزام لگایا تھا۔
