ویب ڈیسک: ڈی آئی خان میں پاک فوج کے تعاون سے شیرانی قوم کے مشران و عمائدین کا گرینڈ امن جرگہ منعقد ہوا، عمائدین نے پاک فوج کا مکمل ساتھ دینے کا اعلان کیا۔
گرینڈ امن جرگہ میں شیرانی قوم کے مشران، عمائدین علما کرام، سمیت اساتذہ کرام و دیگر مکاتب فکر کے لوگوں نے بڑی تعداد میں شرکت کی۔
جرگہ کے دوران شرکا نے علاقائی امن کے قیام اور دہشت گردوں کے خاتمے کیلئے پاک فوج کا مکمل ساتھ دینے کا اعلان کیا۔
مشران و عمائدین نے پاک فوج و سکیورٹی فورسز اور ان کے شہدا کی لازوال قربانیوں کو زبردست خراج تحسین پیش کیا۔
مشران نے متفقہ طور پر دہشت گردوں اور شر پسند عناصر کی روک تھام اور اس سلسلے میں حکام کے ساتھ مکمل تعاون کی بھی یقین دہانی کرائی، درازندہ میں مقامی بریگیڈ کمانڈر نے خصوصی طور پر جرگہ میں شرکت کی۔
اس موقع پر مشران، عمائدین، علما اور مشائخ کرام نے علاقے میں تعلیم، صحت خصوصا بچیوں کی تعلیم کے حوالے سے کی جانے والی کاوشوں پر پاک فوج کا شکریہ ادا کیا۔
