ویب ڈیسک: وزیراعظم شہبازشریف وفد کے ہمراہ بیلاروس پہنچ گئے، دو روزہ دورے کے دوران اہم معاہدوں کا امکان ہے، اس دورہ میں سابق وزیراعظم نواز شریف اور وزیراعلیٰ پنجاب مریم نواز و دیگر بھی ان کے ہمراہ ہیں۔ بیلا روس کے صدر الیگزینڈر لوکاشینکو کی جانب سے صدر مسلم لیگ ن نواز شریف اور وزیراعظم محمد شہباز شریف کے اعزاز میں اپنے فارم ہاؤس پر بھرپور عشائیہ دیا گیا۔
گزشتہ روز وزیراعظم شہباز شریف وفد کے ہمراہ بیلاروس پہنچے، اپنے 2 روزہ سرکاری دورے کے دوران اہم ملاقاتوں کے علاوہ اہم معاہدوں کا بھی امکان ظاہر کیا جا رہا ہے، بیلاروس پہنچنے پر وزیراعظم الیگزینڈر تورچن نے پاکستانی وفد کا ائیرپورٹ پر استقبال کیا، پاکستانی سفارت خانے کے افسران بھی ہوائی اڈے پر موجود تھے۔
دورہ کے دوران وزیراعظم کے ہمراہ نواز شریف اور وزیراعلیٰ پنجاب مریم نواز کے علاوہ وزیر خارجہ اسحاق ڈار، وزیر اطلاعات عطااللہ تارڑ، معاون خصوصی طارق فاطمی اور پنجاب کی سینئر وزیر مریم اورنگزیب بھی تھے۔ صدر لوکاشینکو نے وزیراعظم شہباز شریف اور سابق وزیراعظم نواز شریف کے لیے غیر معمولی گرمجوشی کا اظہار کیا۔
اس سے قبل وزیراعظم نے بیلا روس کے دارالحکومت منسک کے وکٹری سکوائر کا دورہ بھی کیا، اور دوسری عالمی جنگ میں جاں بحق فوجیوں کی یادگار،وکٹری اسکوائر پر پھول رکھے۔ یاد رہے وزیراعظم شہبازشریف وفد کے ہمراہ بیلاروس پہنچ گئے، دو روزہ دورے کے دوران اہم معاہدوں کا امکان ہے.
