ویب ڈیسک: راولپنڈی کور کے 166افسروں اور جوانوں کو قوم کے لیے شان دار خدمات کے اعتراف میں فوجی اعزازات عطا کئے گئے ۔
پاک فوج کے شعبہ تعلقات عامہ کے مطابق راولپنڈی کور کے 166افسران اور جوانوں کو اعزازات دینے کے لیے منعقد پروقار تقریب کے مہمان خصوصی کور کمانڈر راولپنڈی لیفٹیننٹ جنرل شاہد امتیاز تھے۔
لیفٹیننٹ جنرل شاہد امتیاز نے تقریب کے دوران فوجی افسروں اور جوانوں کو تمغہ امتیاز(ملٹری)، ستارہ امتیاز (ملٹری)اور تمغہ بسالت کے اعزازات سے نوازا۔
آئی ایس پی آر نے بتایا کہ دو جونیئر کمیشنڈ افسران اور 15 سپاہیوں کو تمغہ بسالت سے نوازا گیا، 47 افسران کو ستارہ امتیاز (ملٹری)اور 102افسران کو تمغہ امتیاز (ملٹری)سے نوازا گیا۔
بیان میں کہا گیا کہ شہدا کے قریبی رشتہ داروں نے بعد از مرگ ان کے اعزازات وصول کیے۔
آئی ایس پی آر نے بتایا کہ کور کمانڈر نے شہدا کے اہل خانہ سے ملاقات کی اور شہدا کی قربانیوں کو شان دار خراج عقیدت پیش کیا، تقریب میں بڑی تعداد میں اعلی فوجی افسران اور ایوارڈ حاصل کرنے والوں کے اہل خانہ نے شرکت کی۔
