ویب ڈیسک: ضلع کرم میں بنکرز کی مسماری کا عمل مکمل کرلیا گیا جس کے بعد انتظامیہ نے اسلحہ اکٹھا کرنے کا دوسرا مرحلہ جلد شروع کرنے کا اعلان کیا ہے ۔
سرکاری ذرائع کے مطابق ضلع کرم میں گزشتہ دو مہینوں کے دوران 979 بنکروں کو مسمار کرنے کا کام کامیابی سے مکمل کر لیا گیا۔
یکم جنوری 2025کو کوہاٹ میں کئے جانے والے امن معاہدے کے مطابق مسمار کئے جانے والے بنکرز دونوں فریقین کے علاقوں میں تھے ۔
ذرائع نے بتایا کہ بنکرز مسمار کئے جانے کے بعد اب تمام فریقین کی جانب سے اسلحہ جمع کرانے کا مرحلہ وار سلسلہ شروع کیا جائے گا۔
کرم میں پچھلے تین مہینوں میں اشیائے خورو نوش، ادویات اور روزمرہ ضرورت کی اشیا کی ترسیل کے لیے 1984 گاڑیاں بھیجی جا چکی ہیں۔
اسی طرح بگن بازار میں دکانوں اور عمارتوں کی مرمت کے لیے خاندانوں کو رقم کی ادائیگی کر دی گئی ہے جبکہ کرم میں متاثرہ خاندانوں میں امدادی رقوم کی تقسیم کا سلسلہ بھی جاری ہے۔
سرکاری ذرائع کا مزید کہنا تھا کہ قانون توڑنے اور صورتحال کو خراب کرنے والے شر پسند عناصر سے آہنی ہاتھوں سے نمٹا جائے گا
