ویب ڈیسک: سپریم کورٹ نے سماعت کے دوران 9مئی مقدمات کی اپیلوں پر ٹرائل 4ماہ میں مکمل کرنے کی ہدایت جاری کر دی، خدیجہ شاہ سمیت تمام ملزموں کے قانونی حقوق کی فراہمی یقینی بنائیں گے، عدالتی حکم میں اس حوالے سے وضاحت بھی کریں گے۔
سپریم کورٹ میں نو مئی کے ملزمان کی ضمانت منسوخی کی اپیلوں پر سماعت ہوئی، اس دوران عدالت نے پنجاب حکومت کی اپیلیں چار ماہ میں ٹرائل مکمل کرنے کی ہدایت کیساتھ نمٹا دیں، اور سپریم کورٹ نے 9مئی مقدمات کی اپیلوں پر ٹرائل 4ماہ میں مکمل کرنے کی ہدایت کی۔
دوران سماعت وکیل سمیر کھوسہ نے کہا کہ خدیجہ شاہ کے ایک کیس میں عدالت نے ایسا ہی حکم دیا، خدیجہ شاہ پر مزید تین مقدمات بھی درج ہیں۔ چیف جسٹس نے کہا کہ خدیجہ شاہ سمیت تمام ملزموں کے قانونی حقوق کی فراہمی یقینی بنائیں گے، عدالتی حکم میں اس حوالے سے وضاحت بھی کریں گے۔
وکیل خدیجہ شاہ نے کہا کہ کئی گواہان کے بیان ریکارڈ ہوچکے، ابھی تک فرد جرم کی کاپی نہیں ملی، ٹرائل کورٹس کی آزادی کو بھی یقینی بنایا جائے، وکیل سمیر کھوسہ نے کہا کہ اے ٹی سی سرگودھا کے جج نے اس حوالے سے ہائی کورٹ کو خط بھی لکھا تھا۔
چیف جسٹس نے کہا کہ اے ٹی سی کی آزادی والا مسئلہ حل ہوچکا، وہ فیصلہ پڑھ لیں، ملزموں کو فرد جرم سمیت تمام دستاویزات کی فراہمی یقینی بنائی جائے گی۔
