ویب ڈیسک: لیبیا میں ایک اور کشتی ڈوب گئی، 4 پاکستانی شناخت کر لئے گئے، جبکہ حادثے کے بعد سمندر سے گیارہ نعشیں نکال لی گئی ہیں۔ ان میں سے تین کا تعلق منڈی بہاؤالدین اور ایک کا گوجرانوالہ سے ہے۔
تفصیلات کے مطابق لیبیا میں ایک اور کشتی ڈوب گئی، 12 اپریل کو پیش آنے والے اس حادثہ کے بعد سے گیارہ نعشیں نکال لی گئیں،جن میں سے چار کی شناخت پاکستانیوں کے طور پر کر لی گئی ہے۔
لیبیا میں موجود پاکستانی سفارتخانے کی جانب سے وزارت خارجہ کو رپورٹ بھیجی گئی ہے، جس میں بتایا گیا ہے کہ لیبیا کے مشرقی علاقے میں سیریت شہر کے قریب ہراوا کوسٹ میں کشتی کو حادثہ12اپریل کو پیش آیا، جبکہ تاحال حادثہ کے مقام سے گیارہ نعشیں نکالی جا چکی ہیں، ان میں سے چار پاکستانیوں کی ہیں۔
اس مراسلہ کے ملنے کے بعد پاکستانی سفارتخانے کی ایک ٹیم نے بتائے گئے سیریت شہر کا دورہ کیا اور واقعہ کی معلومات حاصل کیں، جبکہ قومی دستاویزات کی جانچ پڑتال کی مدد سے جان بحق افراد میں سے چار پاکستانیوں کو شناخت کر لیا، جن میں سے تین کا تعلق منڈی بہاؤالدین اور ایک کا گوجرانوالہ سے ہے۔
رپورٹ کے مطابق زاہد محمود کا تعلق گوجرانوالہ جبکہ سمیر علی، سید علی حسین اور آصف علی کا تعلق منڈی بہاوالدین سے ہے۔ اس کے علاوہ پانچ نعشیں مصری شہریوں کی ہیں۔ پاکستانی سفارتخانہ حادثے کے متعلق مزید معلومات کیلئے مقامی حکام سے رابطے میں ہے۔
