ویب ڈیسک: وزیراعلیٰ خیبرپختونخوا علی امین گنڈاپور کی 40 روزہ حفاظتی ضمانت منظور کر لی گئی، اس حوالے سے پشاور ہائیکورٹ میں سماعت ہوئی، پشاور ہائیکورٹ کے جسٹس صاحبزادہ اسد اللہ اور جسٹس صلاح الدین نے وزیر اعلیٰ خیبرپختونخوا کی حفاظتی ضمانت کی درخواست پر سماعت کی۔
سماعت کے دوران وزیراعلیٰ خیبرپختونخوا علی امین گنڈاپور کی 40 روزہ حفاظتی ضمانت منظور کرتے ہوئے انہیں کسی بھی درج مقدمے میں گرفتار نہ کرنے کا حکم بھِ جاری کر دیا گیا۔ وکیل درخواست گزار کا کہنا تھا کہ وزیراعلیٰ کی میٹنگ تھی اس لئے وہ پیش نہیں ہوئے۔
عدالت نے استفسار کیا کہ تمام کیسز کی رپورٹ آچکی ہے یا نہیں، جس پر وکیل نیب کا کہنا تھا کہ نیب کی صرف ایک انکوائری وزیر اعلیٰ کے خلاف چل رہی ہے۔ وکیل درخواست گزار نے کہا کہ 66 مختلف مقدمات وزیر اعلیٰ کے خلاف درج ہیں۔
عدالت نے کہا کہ جتنا وقت آپ مانگ رہے ہیں وہ ہم نہیں دے سکتے، بعدازاں عدالت نے وزیر اعلیٰ خیبرپختونخوا سردار علی امین گنڈاپور کو 40 روز تک حفاظتی ضمانت دے دی، جبکہ اس کے ساتھ ہی حکم جاری کیا کہ اس دوران علی امین کو کسی بھی درج مقدمے میں گرفتار نہ کیا جائے۔
