ویب ڈیسک: وزیراعلیٰ پنجاب مریم نواز سے امریکی کانگریس کے وفد سے ملاقات کے دوران پنجاب میں سرمایہ کاری کی دعوت دے دی ۔
مریم نواز سے ملاقات کرنے والوں میں کانگریس مین ٹام سوزی، جوناتھن جیکسن، پولیٹیکل آفیسر نکھل ہاکن، قائم مقام امریکی سفیر نتالی بیکر اور قونصل جنرل کرسٹن ہاکنز شامل تھے۔
ملاقات میں باہمی دلچسپی کے اہم امور پر تبادلہ خیال، پاک امریکہ تعلقات کے استحکام اور فروغ کے لئے موثر اقدامات پر اتفاق اور پنجاب میں سرمایہ کاری، معاشی ترقی کے لئے وسیع البنیاد اور دوطرفہ تعاون کے فروغ کا عزم کیا گیا۔
اس دوران پاک امریکہ تعلقات، تجارت، سرمایہ کاری اور جمہوری اداروں کے درمیان روابط کے فروغ پر بھی تفصیلی تبادلہ خیال ہوا۔
اس موقع پر مریم نواز نے امریکی وفد کو پنجاب میں زرعی صنعت، آئی ٹی، توانائی، صحت اور تعلیم جیسے شعبوں میں سرمایہ کاری کی دعوت دی، وزیراعلی نے امریکی وفد کو پارلیمانی سطح پر وفود کے تبادلے کو مزید بڑھانے کی تجویز بھی دی۔
وزیراعلی پنجاب نے کہا ہے کہ غیر ملکی اداروں کی سرمایہ کاری کو مزید وسعت دینے کے خواہاں ہیں، انفارمیشن ٹیکنالوجی کے شعبے میں پاک امریکہ تعاون کے نئے باب کا آغاز ہو چکا ہے، پاک امریکہ تعلقات کو بڑی قدر کی نگاہ سے دیکھتے ہیں، پاک امریکہ پارٹنرشپ میں مزید وسعت کی گنجائش موجود ہے۔
