ویب ڈیسک: جماعت اسلامی پاکستان نے فلسطین پر جاری اسرائیلی مظالم کے خلاف 20اپریل کو ملک گیر مارچ کرنے کا اعلان کر دیا۔
وفاقی دارالحکومت میں پریس کانفرنس کرتے ہوئے جماعت اسلامی کے مرکزی امیر حافظ نعیم الرحمان نے کہا ہے کہ 20اپریل کو ملک بھر سے قافلے آئیں گے اور امریکی ایمبیسی کے سامنے جا کر احتجاج کریں گے۔
ان کا کہنا تھا کہ امریکا نے ایک دفعہ پھر اپنے آپ کو دہشت گرد ثابت کیا ہے، امریکا نے ہیرو شیما اور ناگا ساگی پر بم پھینکا۔
انہوں نے کہا کہ فلسطینی بھائیوں سے اظہار یکجہتی کیلئے 22 اپریل کو ملک گیر ہڑتال ہوگی اور 22اپریل سے متعلق کوئی کنفیوژن نہیں ہے، ہم ہڑتال کریں گے، لوگ اسرائیل اور امریکا کے خلاف نفرت کر رہے ہیں، نفرت کی لہر پوری دنیا میں موجود ہے، اسرائیل چھوٹے چھوٹے بچوں کو گولیاں مار کر قتل کر رہا ہے۔
امیر جماعت اسلامی نے مزید کہا کہ حماس جمہوری طریقے سے جیتے تھے مگر ان کی حکومت نہیں بننے دی، حماس سے کہا جا رہا ہے کہ وہ ہتھیار ڈال دے، جب تک لوگوں کا سمندر بار بار سڑکوں پر نہیں آئے گا اسی طرح قتل عام جاری رہے گا۔
حافظ نعیم الرحمان نے کہا کہ اسرائیل توسیع پسندانہ کام کر رہا ہے، عرب ممالک اور پاکستان کو اس بارے میں سوچنا چاہیے کہ فوجی سطح پر حکمت عملی بنانا پڑے گی اور اسرائیل کے خلاف متحد ہونا ہوگا۔
امیر جماعت اسلامی کا کہنا تھا کہ عوام کو مثبت طریقے سے سڑکوں پر لا رہے ہیں، ہم انسانیت کیلئے یہ فریضہ سر انجام دے رہے ہیں، میں اپیل کرتا ہوں ان تمام چیزوں کا بائیکاٹ کریں جن سے صیہونیوں کو فائدہ ملتا ہے اور ہمیں معلوم ہے ہم نے کن چیزوں کا بائیکاٹ کرنا ہے۔
