ویب ڈیسک: وزیراعظم شہباز شریف نے کہا ہے کہ چین نے ہر موقع پر ہمارا ساتھ دیا، آئی ایم ایف معاہدے میں بھی دوست ملک چین کا ساتھ رہا، چین،سعودی عرب اور امارات پاکستان کے بہترین دوست ہیں، انہوں نے ہر موڑ پر دوستی نبھائی.
تفصیلات کے مطابق وزیراعظم شہباز شریف نے زرعی سکالر شپ پروگرام کے تحت 300 طلباء کو چین بھیجنے کے پہلے مرحلے کے حوالے سے منعقدہ تقریب سے خطاب کرتے ہوئے کہا کہ آج شعبہ زراعت کیلئے ایک انتہائی اہم دن ہے، پاکستان کے زرعی گریجویٹس آج اعلیٰ تعلیم کیلئے چین جا رہے ہیں، پاکستانی طلبہ کو شکالر شپ فراہم کرنے پر چینی حکومت کے مشکور ہیں۔
انہوں نے کہا کہ اپنے دورہ چین میں زرعی یونیورسٹی کا دورہ کیا، اور ان کی تحقیق نے بے حد متاثر کیا، اسی وقت میں نے فیصلہ کیا کہ ہم اپنے زرعی گریجویٹس کو تربیت کیلئے چین بھجوائیں گے،ا ور آج اس سلسلے میں پہلا قدم اٹھاتے ہوئے 300 طلبہ کو چین بھیج رہے ہیں، جن کی کارکردگی سے آگے چل کر ملک فائدہ اٹھائے گا.
ان کا کہنا تھا کہ پاکستانی طلبہ بیجنگ اور اسلام آباد کے درمیان پل کا کردار ادا کریں گے، چین سے تربیت حاصل کرنے والے طلبہ پاکستان کے زرعی شعبے کی ترقی میں اہم کردار ادا کریں گے، سکالر شپ پروگرام کیلئے زرعی گریجویٹس کا میرٹ پر انتخاب کیا گیا ہے، آزاد کشمیر اور گلگت بلتستان سمیت چاروں صوبوں سے طلبہ کا انتخاب کیا گیا، سکالر شپ پر چین بھجوائے جانے والے گریجویٹس میں بلوچستان کا کوٹہ 10 فیصد زائد ہے۔
وزیراعظم کا کہنا تھا کہ چاروں اکائیوں کو مل کر ملکی ترقی کیلئے کام کرنا ہوگا، چین نے ہر موقع پر پاکستان کا ساتھ دیا، آئی ایم ایف پروگرام کے حصول میں بھی چین کا تعاون مثالی تھا، چین،سعودی عرب اور امارات پاکستان کے بہترین دوست ہیں، ان کی دوستی نے ہر موڑ پر ہمیں مضبو ط رہنے کی ہمت دی.
انہوں نے طلبہ کو مخاطب کرتے ہوئے کہا کہ طلبہ چین سے زراعت کے جدید طریقے سیکھ کر پاکستان کے زرعی شعبے کی ترقی کا ذریعہ بنیں، دیہی علاقوں میں زرعی شعبے سے وابستہ چھوٹے و درمیانے کاروبار کے بے پناہ مواقع موجود ہیں، زرعی مصنوعات کی ویلیوایڈیشن پر توجہ دی جائے۔
