ویب ڈیسک: پاک افغان دوطرفہ تعلقات کے فروغ کیلئے مذاکرات آج ہونگے، یاد رہے کہ مذاکرات افغانستان کے دارالحکومت کابل میں طے پائے ہیں۔
تفصیلات کے مطابق پاک افغان دوطرفہ تعلقات کے فروغ کے لیے جوائنٹ کوآرڈی نیشن کمیٹی کا اجلاس آج کابل میں ہو رہا ہے، جس کیلئے پاکستان کا اعلیٰ سطحی وفد کابل پہنچ چکا ہے، جس کی قیادت افغانستان کے لیے پاکستان کے نمائندہ خصوصی محمد صادق کر رہے ہیں۔ وفد میں متعلقہ وزارتوں اور محکموں کے سینئر حکام بھی شامل ہیں۔
اجلاس میں دونوں ممالک کے درمیان معاشی تعاون سمیت مختلف شعبوں میں تعلقات کے فروغ پر تفصیلی بات چیت کی جائے گی، ان اہم مذاکرات سے قبل پاکستانی ہیڈ آف مشن عبیدالرحمٰن نظامانی نے افغان وزیر خارجہ ملا امیر متقی سے اہم ملاقات کی، جس میں افغان مہاجرین کی باعزت واپسی، خطے میں امن و استحکام اور دو طرفہ تعلقات کے فروغ سے متعلق امور زیر بحث آئے۔
دونوں ممالک کے درمیان ملاقات خوشگوار ماحول میں ہوئی، اور اس بات پر زور دیا گیا کہ رابطے برقرار رکھنا دوطرفہ تعلقات کو بہتر بنانے کے لیے نہایت اہم ہے۔ افغان مہاجرین کی واپسی سے متعلق ایک انسانی اور باعزت حل تلاش کرنے پر بھی بات چیت کی گئی۔
