ویب ڈیسک: صدر زرداری نے گوجرانوالہ کنٹونمنٹ کا دورہ کیا، اور صدر نے بلااشتعال جارحیت کیخلاف مسلح افواج کے عزم اور غیر متزلزل حوصلے کی تعریف کی۔ان کا کہنا تھا کہ بہادر جوانوں کی قربانیاں مقدس امانت اور پائیدار قومی فخر کا ذریعہ ہیں.
پاک فوج کے شعبہ تعلقات عامہ آئی ایس پی آر کے مطابق صدر مملکت آصف زرداری نے گوجرانوالہ کنٹونمنٹ کا دورہ کیا، گوجرانوالہ کنٹونمنٹ آمد پر آرمی چیف جنرل سید عاصم منیر نے صدر مملکت کا استقبال کیا،وزیر داخلہ محسن نقوی بھی صدر مملکت کے ساتھ تھے، جبکہ کور کمانڈر گوجرانوالہ اور منگلا بھی اس موقع پر موجود تھے۔
آئی ایس پی آر کے مطابق صدر نے کامیاب معرکہ حق میں مسلح افواج کی مثالی پیشہ ورانہ صلاحیت کو سراہا، صدر نے بلااشتعال جارحیت کیخلاف مسلح افواج کے عزم اور غیر متزلزل حوصلے کی تعریف کی، اور مادر وطن کے دفاع میں اپنی جانوں کا نذرانہ پیش کرنے والے فوجی اور سویلین شہداء کو زبردست خراج عقیدت پیش کرتے ہوئے کہا کہ جوانوں کی قربانیاں مقدس امانت اور پائیدار قومی فخر کا ذریعہ ہیں۔
آئی ایس پی آر کے مطابق آصف زرداری نے اس بات پر زور دیا کہ قوم کے پائیدار جذبے سے پاک مٹی کے بیٹے مادر وطن کے دفاع کے لیے غیر متزلزل عزم کے ساتھ کھڑے ہوئے اور غیر معمولی بہادری اور آپریشنل ذہانت کے ساتھ دشمن کے عزائم کو ناکام بنا دیا۔
انہوں نے مزید کہا کہ تاریخ گواہ ہے کہ کس طرح چند گھنٹوں میں پاکستان کی مسلح افواج نے بے مثال درستگی اور عزم کے ساتھ جارحیت کو پسپا کر کے پاکستان کی طاقت، لچک اور قومی اتحاد کا واضح پیغام دیا۔افسروں اور فوجیوں کے ساتھ بات چیت کے دوران صدر نے ان کے مثالی حوصلے، جنگی تیاری اور فرض کے تئیں لگن کو سراہا۔
صدر مملکت نے آپریشن بُنیان مرصوص کے کامیاب اختتام پر دلی مبارکباد پیش کی اور قوم کے محافظوں پر فخر کا اظہار کیا، آئی ایس پی آر کے مطابق صدر مملکت نے اس بات کا اعادہ کیا کہ پاکستان کے عوام اپنے بہادر سپاہیوں کو قومی عزت اور خودمختاری کے حقیقی محافظوں کے طور پر انتہائی قدر کی نگاہ سے دیکھتے ہیں۔
