ویب ڈیسک: وفاقی وزیر برائے موسمیاتی تبدیلی مصدق ملک نے کہا ہے کہ بھارت آگ اور خون کی ہولی مت کھیلے اور عقل کی بات کرے۔
میڈیا سے گفتگو کرتے ہوئے وفاقی وزیر برائے موسمیاتی تبدیلی مصدق ملک نے کہا کہ ہم اپنی سرزمین پر بھارتی دہشت گردی کے ڈوزئیر دے رہے ہیں،بھارت کے ساتھ جو بات ہو گی برابری کی بنیاد پر ہو گی۔
انہوں نے کہا کہ بھارت کے پہلے 2 طیارے گرائے اب 6 اور اگلی بار 60گرائیں گے،کشمیر سمیت تمام مسائل پر بھارت کے ساتھ جامع مذاکرات چاہتے ہیں۔
مصدق ملک نے کہا کہ سفارتی فتح کا سہرا وزیر اعظم شہباز شریف اور نائب وزیراعظم اسحاق ڈار کو جاتا ہے۔ اور آج ہماری سفارتی فوقیت کی بڑی وجہ بھارت سے ہماری عسکری فتح ہے۔
انہوں نے کہا کہ تین، چار دن کی جنگ میں بھارت کا برتری کا خواب خاک میں مل گیا۔ اور بھارتی جدید لڑاکا طیارے رافیل چڑیوں کی طرح نیچے گرے۔ دنیا پر واضح ہو گیا پاکستان اپنی سرحدوں کی حفاظت کرنا جانتا ہے۔ لیکن جنگ میں فتح کے باوجود ہم امن کا پیغام لے کر چلے ہیں۔
