ویب ڈیسک: اسرائیل کے ایران پر حملے کے ردعمل میں ایران کے رہبرِ انقلاب آیت اللہ سید علی خامنہ ای نے کہا ہے کہ اسرائیل نے اپنے تلخ اور دردناک تقدیر کی بنیاد رکھ دی ہے، اسرائیل کو ایک سخت جواب کا انتظار کرنا چاہیے، جلد ہی اسے پتہ چل جائیگا کہ اس نے کیا کیا ہے۔
اسلامی انقلاب کے رہبرِ اعلیٰ آیت اللہ سید علی خامنہ ای نے آج صبح قوم سے خطاب میں اسرائیلی حملوں کی شدید مذمت کی، جن میں تہران سمیت ایران کے دیگر شہروں کو نشانہ بنایا گیا۔
اپنے پیغام میں انہوں نے کہا کہ اسرائیل کو اس سنگین اقدام کی سخت سزا بھگتنی ہو گی، صہیونی حکومت نے اپنے خون آلود ہاتھوں سے ہمارے عزیز وطن میں جرم کا ارتکاب کیا، اور رہائشی علاقوں کو نشانہ بنا کر اپنی شیطانی فطرت کو مزید آشکار کر دیا۔
رہبرِ انقلاب نے زور دیتے ہوئے کہا کہ اسرائیل کو ایک سخت جواب کا انتظار کرنا چاہیے، جلد ہی اسے اندازہ ہو جائیگا کہ اس نے کیا کیا ہے۔
