ویب ڈیسک: ایرانی پاسداران انقلاب کے اعلیٰ کمانڈر جنرل احمد واحدی نے کہا ہےکہ آج دشمن کو اپنی سنگین غلطی کا اندازہ ہوگیا ہے، اسرائیل سمجھ رہا تھا کہ ایک دو مراکز کو نشانہ بنا کر ایران کو کمزور کر دے گا، لیکن ان کا اندازہ غلط تھا، اب وہ نتائج بھگتے گا اور جو ان کا دفاع کرے گا وہ اس جنگ سے دور رہیں، اسرائیل کو اندازہ ہو گیا ہے کہ اس نے کتنی بڑی غلطی کی ہے، اور اب وہ اس کے نتائج بھگتنے کے مرحلے میں داخل ہوچکے ہیں۔
ایرانی جنرل واحدی نے میڈیا سے گفتگو میںکہا ہے کہ تل ابیب میں وزارت دفاع، صنعتی اور فوجی مراکز بھی براہ راست ایرانی حملے کا نشانہ بنے، آپریشن میں ہمارے اہداف میں سب سے اہم نواتیم، اودا اور تل نوف کے فضائی اڈے تھے، ان فضائی اڈوں پر اسرائیلی فضائیہ کی کمانڈ اور دیگر جنگی مراکز موجود تھے۔
انہوںنے بتایا کہ یہی اڈے ایران پر حالیہ حملے کا نقطۂ آغاز تھے، مجموعی طور پر اسرائیل پر میزائل حملوں میں 150 سے زائد اہداف کامیابی سے نشانہ بنائے گئے، اسرائیل کو سمجھ آگیا ہوگاکہ ایران پوری قوت کے ساتھ جواب دینے کی صلاحیت رکھتا ہے، آئندہ بھی ایسے جوابی اقدامات دہرائے جا سکتے ہیں۔
انہوں نے مزید کہا کہ دشمن سمجھ بیٹھا تھا کچھ فوجی مراکز کو نشانہ بنا کر ہمیں کمزور کر دے گا اور ہم خاموش رہیں گے، آج دشمن کو اپنی سنگین غلطی کا اندازہ ہوگیا ہے، اب وہ اس کے نتائج بھگتنے کے مرحلے میں داخل ہوچکے ہیں۔دوسری جانب اقوام متحدہ میں ایرانی سفیر کا کہنا ہے کہ ایران اسرائیل کی بلااشتعال جارحیت کا سختی سے جواب دے گا۔
