ویب ڈیسک: وزیراعظم شہباز شریف نے ایرانی صدر مسعود پزشکیان سے ٹیلیفونک رابطہ کیا اور اسرائیل کی جارحیت کیخلاف ایران کیساتھ مکمل یکجہتی کا اظہار کیا، اور کہا کہ اسرائیلی جارحیت پر پاکستان ایران کیساتھ کھڑا ہے۔
وزیراعظم آفس کے مطابق وزیراعظم شہبازشریف نے ایرانی صدر مسعود پزشکیان سے ٹیلیفونک رابطہ کیا ہے، اس دوران گفتگو کرتے ہوئے ان کا کہنا تھا کہ اسرائیلی جارحیت پر پاکستان ایران کیساتھ کھڑا ہے، جبکہ اس موقع پر انہوں نے اسرائیلی بربریت کی شدید مذمت کی۔
وزیراعظم شہباز شریف کا کہنا تھا کہ اسرائیلی حملہ ایران کی خودمختاری اور علاقائی سالمیت، اور اقوام متحدہ کے چارٹر اور بین الاقوامی قوانین کی مکمل خلاف ورزی ہے، ایران کو اقوام متحدہ کے چارٹر کے آرٹیکل 51 کے تحت اپنے دفاع کا حق حاصل ہے، جبکہ اسرائیلی جارحیت پر پاکستان ایران کیساتھ کھڑا ہے۔
وزیراعظم نے صیہونی حملوں میں قیمتی جانوں کے ضیاع پر ایرانی صدر سے تعزیت کی اور کہا کہ اسرائیل کی اشتعال انگیزی اور مہم جوئی علاقائی اور عالمی امن کے لیے سنگین خطرہ ہے، پاکستان خطے میں امن کے فروغ کے لیے اپنا کردار ادا کرنے کے لیے تیار ہے۔
وزیراعظم آفس کے مطابق ایرانی صدر نے مشکل وقت میں ایران کی حمایت اور یکجہتی پر وزیراعظم شہباز شریف کا شکریہ ادا کیا، اور اقوام متحدہ کی سلامتی کونسل میں ایران کی حمایت پر وزیراعظم پاکستان کا شکریہ ادا کیا۔
ایرانی صدر نے کہا کہ یہ دونوں ممالک کے درمیان قریبی اور برادرانہ تعلقات کا عکاس ہے، ایرانی صدر نے وزیراعظم کو اسرائیل کے ساتھ بحران پر ایران کے نقطہ نظر سے آگاہ کیا۔ ایرانی صدر نے عالمی برادری اور اسلامی ممالک سے ان خطرات کا مقابلہ کرنے کے لیے مل کر کام کرنے پر زور دیا۔ یاد رہے کہ وزیراعظم اور ایرانی صدر نے قریبی رابطے میں رہنے پر بھی اتفاق کیا۔
