ویب ڈیسک: وزیراعظم شہبازشریف کی فضل الرحمان سے ملاقات ان کی رہائش گاہ پر ہوئی، اس دوران ملکی مجموعی صورتحال پر تبادلہ خیال کرنے کے ساتھ ساتھ وزیراعظم نے مولانا کے چھوٹے بیٹے اسجد محمود پر حملے اور اغوا کی ناکام کوشش پر انتہائی تشویش کا اظہار کیا، اور خیریت دریافت کی.
تفصیلات کے مطابق وزیراعظم شہبازشریف نے جمعیت علمائے اسلام ف کے سربراہ مولانا فضل الرحمان کی رہائش گاہ میں ان سے ملاقات کی، اس دوران وزیر اعظم نے اسجد محمود پر حملے اور اغوا کرنے کی ناکام کوشش میں ملوث افراد کو جلد از جلد قانون کی گرفت میں لانے کے احکامات جاری کیے.
وزیراعظم اور قائد جمیعت کے مابین ہونے والی ملاقات میں ملک کی مجموعی و سیاسی صورت حال پر بھی تبادلہء خیال کیا گیا، اس موقع پر سابق وفاقی وزیر مولانا اسعد محمود، مولانا لطف الرحمان، مولانا عبید الرحمان اور مفتی ابرار احمد ، جبکہ وزیراعظم کے ہمراہ وفاقی وزیر منصوبہ بندی احسن اقبال ،اعظم نذیر تارڑ ، عطاء تارڑ اور وزیر اعظم کے مشیر برائے سیاسی امور رانا ثناء اللہ بھی موجود تھے.
