ویب ڈیسک: خیبرپختونخوا کے مشیر اطلاعات بیرسٹر ڈاکٹر سیف نے دو ٹوک الفاظ میں واضح کیا کہ عمران خان کی مشاورت کے بغیر خیبر پختونخوا کا آئندہ مالی سال کا بجٹ منظور نہیںہوگا، عوام نے عمران خان کے نظریے کو ووٹ دیا ہے اس لیے بجٹ بھی انہی کی مشاورت سے منظور کیا جائے گا.
تفصیلات کے مطابق پاکستان تحریک انصاف کے سینئر رہنما اور صوبائی مشیر اطلاعات بیرسٹر ڈاکٹر سیف نے واضح کیا ہے کہ بانی چیئرمین اور سابق وزیراعظم عمران خان کی مشاورت کے بغیر خیبر پختونخوا کا بجٹ منظور نہیںہوگا، اس سلسلے میںان سے مشاورت لازمی ہے.
میڈیا سے گفتگو کرتے ہوئے انہوں نے کہا کہ عوام نے عمران خان کے نظریے کو ووٹ دیا ہے، اس لیے بجٹ بھی انہی کی مشاورت سے منظور کیا جائے گا، اگر کسی قسم کی ایمرجنسی نافذ کرنے کی کوشش کی گئی، تو یہ جعلی حکومت ایک دن بھی نہیں چل سکے گی، کسی صورت عوام اپنے مینڈیٹ کی توہین برداشت نہیں کریں گے.
بیرسٹر ڈاکٹر سیف نے کہا کہ خیبر پختونخوا اسمبلی تحلیل کرنے کا اختیار صرف وزیراعلیٰ کے پاس ہے اور وہ جب چاہیں ایسا اقدام اٹھا سکتے ہیں، انہوں نے دعویٰ کیا کہ خیبر پختونخوا واحد صوبہ ہے جہاں "فارم 45” کی بنیاد پر عوامی مینڈیٹ کے مطابق حکومت قائم ہے، جبکہ وفاقی اور دیگر صوبائی حکومتیں "فارم 47” کے جعلی مینار پر لڑکھڑاتی ہوئی کھڑی ہیں.
خیبرپختونخوا کے مشیر اطلاعات کا کہنا تھا کہ ایسی جعلی حکومتوں کو گرانے کے لیے صرف ایک دھکہ ہی کافی ہوتا ہے، ہم اپنے عوامی مینڈیٹ کا ہر قیمت پر تحفظ کریں گے۔
