ویب ڈیسک: فتنہ الخوارج کے دہشت گرد پسپا، حملہ میں ناکامی، ڈیرہ اسماعیل خان پولیس کی بھرپور کارروائی سے ایک دہشتگرد ہلاک جبکہ دو زخمی ہو گئے، اس کامیابی پر آئی جی کی ستائش۔
تفصیلات کے مطابق ڈیرہ اسماعیل خان کے تھانہ ہتھالہ کی حدود علاقہ ملنگ کے قریب دہشتگردوں نے پولیس پارٹی کو نشانہ بنانے کی کوشش کی، تاہم ڈیرہ اسماعیل خان پولیس کی بھرپور کارروائی میں ایک دہشتگرد ہلاک جبکہ دو زخمی ہو گئے، پولیس کے کوئک رسپانس پر دہشتگردوں کا حملہ پسپا ہو گیا ہے۔
پولیس کی جوابی کارروائی میں کالعدم تحریک طالبان گنڈاپور گروپ کا سرگرم دہشتگرد فتح ولد حنان ہلاک جبکہ دو مزید دہشتگرد زخمی ہوئے ہیں۔ یاد رہے پولیس نفری ٹکواڑہ کے علاقے میں ڈیوٹی سرانجام دینے کے بعد واپس آرہی تھی کہ دہشت گردوں نے حملہ کر دیا۔
ڈی پی او ڈیرہ اسماعیل خان سجاد احمد صاحبزادہ کی قیادت میں ایس پی صدر اور ڈیرہ پولیس کی تازہ دم نفری نے جائے وقوعہ پہنچ کر زخمی دہشتگردوں کی گرفتاری کے لئے سرچ اینڈ سٹرائیک آپریشن شروع کردیا ہے۔
انسپکٹر جنرل آف پولیس خیبرپختونخوا ذوالفقار حمید نے فتنہ الخوارج کے خلاف سیسہ پلائی دیوار ثابت ہونے پر ڈیرہ پولیس کی تعریف کی، اور کامیاب کارروائی میں شامل افسران اور جوانوں کیلئے انعامات کا اعلان کیا۔
