ویب ڈیسک: ایرانی جوہری تنصیبات پر امریکی حملوں کے بعد ایرانی سپریم لیڈر سید علی خامنہ ای کے مشیر علی شمخانی نے سوشل میڈیا پر اہم بیان جاری کرتے ہوئے کہا ہے کہ کھیل ابھی ختم نہیں ہوا، امریکی الزامات بے بنیاد ہیں۔
ذرائع کے مطابق ایران نے امریکی حملے کا بھرپور جواب دینے کا اعلان کر دیا ہے۔ سینئر مشیر علی شمخانی نے امریکا کے حملے کے بعد اہم اور سخت لہجے میں بیان جاری کیا ہے۔ ان کا کہنا تھا کہ اگر یہ مان بھی لیا جائے کہ جوہری تنصیبات مکمل طور تباہ ہو گئیں ہیں تب بھی کھیل ابھی ختم نہیں ہوا، افزودہ مواد محفوظ ہے، مقامی ٹیکنالوجی اور صلاحیتیں بھی موجود ہیں اور سیاسی ارادہ بھی۔
اقوام متحدہ میں ایرانی مندوب نے سلامتی کونسل کے ہنگامی اجلاس سے خطاب کرتے ہوئے امریکا کے تمام الزامات بے بنیاد قرار دیتے ہوئے کہا کہ الزامات کی قانون حیثیت نہیں بلکہ سیاسی محرکات ہیں، ان کی کوئی قانونی بنیاد نہیں۔
ان کا کہنا تھاکہ حملے کا جواب دینے کے وقت اور نوعیت کا فیصلہ ایرانی افواج کریں گی، تاہم ایران پر حملہ عالمی قوانین کی خلاف ورزی ہے، جنگی مجرم نیتن یاہو امریکا کو جنگ میں دھکیلنے میں کامیاب ہوا، اور امریکا نے نیتن یاہو کی خاطر تمام حدیں پار کرتے ہوئے سفارتی کوششوں کو متاثر کیا۔
سوشل میڈیا پر جاری اپنے ایک بیان میں علی شمخانی کا کہنا تھا کہ اگرچہ امریکی حملے شدید نوعیت کے تھے، مگر ایران کی جوہری صلاحیت اور مزاحمتی قوت باقی ہے اور کھیل ابھی ختم نہیں ہوا۔
انہوں نے کہا کہ اگر یہ مان بھی لیا جائے کہ جوہری تنصیبات مکمل طور پر تباہ ہو گئی ہیں، تب بھی ہمارا افزودہ یورینیم محفوظ ہے، مقامی سطح پر حاصل شدہ ٹیکنالوجی، مہارت اور انسانی وسائل بدستور موجود ہیں اور سب سے بڑھ کر ہمارا سیاسی عزم قائم ہے۔
ایرانی اعلیٰ رہنما کے مشیر کا واضح الفاظ میں امریکا اور اسرائیل کو وارننگ دیتے ہوئے کہنا تھا کہ آئندہ اقدام اب اس فریق کے ہاتھ میں ہے جو ہوشیاری سے کھیلتا ہے اور جذباتی و اندھے فیصلوں سے اجتناب کرتا ہے، یہ سمجھ لیا جائے کہ سرپرائز کا سلسلہ ابھی رکا نہیں ہے بلکہ جاری رہے گا۔
