ویب ڈیسک: گورنر خیبرپختونخوا فیصل کریم کنڈی کا کہنا ہے کہ وزیراعلیٰ علی امین گنڈاپور سزایافتہ قیدی کی ہدایت پر حکومت چلا رہے ہیں، اسمبلی تحلیل کرنے کی دھمکی آئین سے بغاوت کے مترادف ہے۔
وزیراعلیٰ خیبر پختونخوا علی امین گنڈا پور کی اسمبلی میں تقریر پر ردعمل دیتے ہوئے گورنر فیصل کریم کنڈی کا کہنا تھا کہ اسمبلی کسی فرد واحد کی جاگیر نہیں،جیل کی بیرک سے صوبے کا نظام نہیں چلایا جاسکتا۔
انہوں نے کہا کہ اسمبلی تحلیل کرنے کی دھمکی آئین سے بغاوت کے مترادف ہے،صوبائی اسمبلی وزیراعلی اور ان کی کابینہ کی کرپشن کابڑا ذریعہ ہے۔
گورنر کا مزید کہنا تھا کہ اپوزیشن ارکان نے بھی کہا ہے کہ صوبہ غیر آئینی طرز حکمرانی کاشکار ہے،صوبائی بجٹ پاس کرنا خیبرپختونخوا حکومت کی آئینی مجبوری ہے۔
انہوں نے کہا کہ صوبائی حکومت عوام کو بلیک میل کرنے کی کوشش نہ کرے،صوبے کو غیر جمہوری طریقے سے چلایا گیا تو ہر ممکن قدم اٹھائیں گے۔
