ویب ڈیسک: صوبہ بلوچستان کے دارالحکومت کوئٹہ میں خوفناک حادثہ پیش آیا ہے، مغربی بائی پاس پر اندرون شہر چلنے والی مزدا بس اور پیٹرول سے بھرے لوڈنگ رکشے میں تصادم کے بعد بس میں آگ بھڑک اٹھی تھی۔
اس افسوسناک اور دلخراش واقعہ میں 6مسافر جھلس کر جاں بحق ہو گئے جبکہ 10 افراد زخمی ہو گئے ہیں۔
ریسکیو ذرائع کے مطابق مزدا بس نواں سے ہزار گنجی جا رہی تھی کہ راستے میں پیٹرول سے لوڈ رکشے سے ٹکرا گئی، ٹکر کے فوراً بعد رکشے میں موجود پٹرول نے آگ پکڑ لی، جس نے پوری بس کو لپیٹ میں لے لیا۔
واقعہ کے فوری بعد امدادی ٹیموں نے موقع پر پہنچ کر زخمیوں کو قریبی ہسپتال منتقل کیا، اور فائر بریگیڈ نے بس میں لگی آگ پر قابو پا لیا جبکہ پولیس نے جائے حادثہ کو گھیرے میں لے کر تحقیقات شروع کر دی ہیں۔
بلوچستان حکومت کے ترجمان نے واقعہ پر افسوس کا اظہار کرتے ہوئے کہا کہ تحقیقات کا حکم دے دیا گیا ہے، تحقیقات کے نتائج پر ذمہ داروں کے خلاف سخت کارروائی ہوگی، حکومت کو شدید دکھ اور افسوس ہے، جاں بحق مسافروں کے لواحقین سے دلی ہمدردی کا اظہار کرتے ہیں۔
انہوں نے کہا کہ تمام زخمیوں کے علاج اور سہولتوں کو یقینی بنایا جا رہا ہے، متاثرہ خاندانوں کی ہرممکن مدد کی جائے گی۔
