ویب ڈیسک: ضلع بنوں کے خلیفہ گل نواز ہسپتال کی نرس الفت کی مبینہ خودکشی کے معاملے میں اہم پیشرفت سامنے آئی ہے، اس دوران مقامی عدالت نے قبر کشائی اور دوبارہ پوسٹ مارٹم کا حکم دیدیا، تاکہ نرس کی موت کے اصل اسباب معلوم ہو سکے۔
عدالتی حکام کے مطابق جاں بحق ہونے والی نرس کی قبر کشائی 26 جون 2025 کو دوپہر 12 بجے کی جائے گی، عدالت نے ویمن اینڈ چلڈرن ہسپتال کی تجربہ کار لیڈی ہیلتھ آفیسر کو دوبارہ پوسٹ مارٹم کے لیے نامزد کرنے کی ہدایت جاری کی ہے تاکہ تحقیقات میں مکمل شفافیت اور مہارت کو یقینی بنایا جا سکے۔
مدعی وکیل سیف اللہ ایڈوکیٹ کا کہنا ہے کہ انصاف کے تقاضے پورے کرنے کے لیے ازسرِنو میڈیکل جانچ ناگزیر ہو چکی ہے، کیونکہ ابتدائی پوسٹ مارٹم کرنے والے ڈاکٹر سے کوئی تفصیلی تفتیش نہیں کی گئی تھی۔ عدالت نے آر پی او بنوں کو قبر کشائی کے دوران سکیورٹی کے سخت انتظامات کرنے کی بھی ہدایت دی ہے۔
