ویب ڈیسک: غزہ کا پورا انفراسٹرکچر ملیا میٹ کرنے کے باوجود صیہونی بربریت کا سلسلہ پورے عروج پر ہے، حالیہ واقعات میں 15سالہ فلسطینی ظالم اسرائیلی فوج کے ہاتھوں شہید ہو گیا۔
فلسطینی وزارت صحت نے تصدیق کی ہے کہ اسرائیلی فوج نے گزشتہ روز مغربی کنارے کے علاقے جنین کے قریب ایک 15سالہ لڑکے کو شہید کر دیا، یہ گزشتہ تین دنوں میں دوسرا فلسطینی کم عمر شہید ہے۔
وزارت صحت نے ایک بیان میں بتایا کہ ریان تامر حوشیہ نامی لڑکے کو گردن میں گولی لگی، جو کہ شمال مغربی جنین کے قصبے الیامون میں اسرائیلی فوج کی فائرنگ کا نشانہ بنا۔
فلسطینی ہلال احمر کے مطابق واقعے کے فوری بعد ان کی ٹیم نے ‘انتہائی نازک حالت’ میں ایک نوجوان کو طبی امداد دی، تاہم کچھ دیر بعد اس کی شہادت کی تصدیق کر دی گئی۔
اسرائیلی فوج کے مطابق وہ الیامون میں پیش آئے واقعے کی تحقیقات کر رہے ہیں، یاد رہے مغربی کنارے میں حالیہ مہینوں میں اسرائیلی کارروائیوں میں شدت آئی ہے، جہاں آئے روز نوجوان فلسطینیوں کو گولیوں کا نشانہ بنایا جا رہا ہے۔
