ویب ڈیسک: پاکستان کے نائب وزیراعظم اور وزیر خارجہ اسحاق ڈار نے کہا ہے کہ بھارت اپنی مرضی پاکستان پر مسلط نہیں کر سکتا، لہذا اسے چاہئے کہ وہ اپنی پالیسیوں پر نظرثانی کرے۔
اسلام آبادمیں انسٹی ٹیوٹ آف سٹریٹیجک سٹیڈیز کے یوم تاسیس سے خطاب کرتے ہوئے اسحاق ڈار نے واضح کیا کہ بھارت نے فالس فلیگ آپریشن کی آڑ میں پاکستان پر جارحیت مسلط کی اور ہم نے بھارتی جارحیت کا فوری اور موثر جواب دیا، بھارت نے پہلگام واقعہ پر جھوٹا ڈراما رچایا ، بھارت اپنی پالیسیوں پر ایک بار نظر ثانی کرے، بھارت اپنی مرضی پاکستان پر مسلط نہیں کر سکتا.
ان کا کہنا تھا کہ پاکستان اپنی خود مختاری اور علاقائی سالمیت کے تحفظ کے لیے پر عزم ہے، بھارت پانی کو بطور ہتھیار استعمال کرنا چاہتا ہے، لیکن وہ کسی صورت یک طرفہ طور پر سندھ طاس معاہدہ معطل نہیں کرسکتا .
رہنما ن لیگ اور ناءب وزیراعظم کا کہنا تھا کہ کشمیر عالمی سطح پر تسلیم شدہ ہے، اس مسئلے کے پرامن حل سے خطے میں امن ہوگا، بھارت عالمی قوانین کی کھلی خلاف ورزی کررہا ہے اور پاکستان پرامن بقائے باہمی کے اصول پر عمل پیرا ہے، پاکستان نے ایران اسرائیل جنگ بندی کا خیرمقدم کیا،جبکہ پاکستان ایران کے قانونی مؤقف کی ہمیشہ تائید کرتا رہا ہے.
نائب وزیراعظم نے کہا کہ پاکستان کو مشرق وسطیٰ کے حالیہ واقعات پر گہری تشویش ہے، پاکستان، ایران کے خلاف اسرائیلی جارحیت کی مذمت کرتا ہے، ہم ایران کے حق دفاع کی بھرپور حمایت کرتے ہیں، اسرائیل اور ایران جنگ بندی کا خیر مقدم کرتے ہیں، ایران کے جوہری مسئلے کا حل بات چیت سے نکالا جائے، جبکہ غزہ میں انسانیت سوز مظالم ڈھائے جارہے ہیں.
ان کا کہنا تھا کہ اسرائیل فلسطینیوں کی نسل کشی کے مذموم منصوبے پر عمل پیرا ہے، نہتے فلسطینیوں کے خلاف اسرائیلی بربریت کی تاریخ میں مثال نہیں ملتی، عالمی برادری غزہ میں اسرائیلی مظالم کا سلسلہ بند کرانے کیلئے کردار ادا کرے، فلسطینیوں کے ساتھ انصاف کے بغیر مشرق وسطیٰ میں امن نہیں ہو سکتا، پاکستان مسئلہ فلسطین کے دو ریاستی حل کا حامی ہے۔
