ویب ڈیسک: وزیر دفاع خواجہ آصف کا کہنا ہے کہ بھارت پا کستان پر دوبارہ حملہ کر سکتا ہے ،ایس سی او اجلاس میں پاکستان میں دہشتگردی کے واقعات کے ذکر پر بھارت سیخ پا ہوگیا تھا۔
میڈیا سے گفتگو کرتے ہوئے وزیردفاع خواجہ آصف کا کہنا تھا کہ بھارت کی جانب سے پاکستان پر دوبارہ حملے کا خدشہ موجود ہے،چاہتے ہیں مسئلہ کشمیر سمیت سندھ طاس معاہدے پر بات چیت ہو۔
انہوں نے کہا کہ بھارت کیخلاف جنگ میں استعمال ہونے والی تمام صلاحیتیں ہماری اپنی تھیں،بھارت کیخلاف جنگ میں پاکستان کی فتح سنہری حروف میں لکھی جائیگی۔ بھارت کیخلاف جنگ میں فتح پر بڑے بڑے ملکوں نے مبارکباد دی۔
وزیر دفاع نے مزید کہا کہ شنگھائی تعاون تنظیم کے اجلاس میں پاکستان کو قدر کی نگاہ سے دیکھا گیا،ایس سی او اجلاس میں پاکستان میں دہشتگردی کے واقعات کے ذکر پر بھارت سیخ پا ہوگیا تھا۔
انہوں نے کہا کہ پاکستان میں دہشتگردی کے واقعات پرمتعدد ممالک نے ہمارے موقف کی تائید کی ،بھارت نے اگر پاکستان کا پانی روکا تو اسے جنگ کے مترادف سمجھا جائیگا۔
وزیردفاع کا کہنا تھا کہ پنڈی اور اسلام آبا د میں ایسا رشتہ ہوناچاہیے جس سے ملک کو نقصان نہ ہو،فیلڈ مارشل سید عاصم منیر کادورہ امریکا حکومتی سطح پر تھا،امریکا کیساتھ تعلقات ون وے نہیں ٹو وے ہیں۔
انہوں نے کہا کہ امریکا کیساتھ تعلقات پر معاشی اور سفارتی سطح پر فائدے ہو رہے ہیں،فلسطینیوں پر جو ظلم ہورہا ہے اس کی تاریخ میں کوئی مثال نہیں ملتی ۔
