ویب ڈیسک: پاکستان تحریک انصاف نے مخصوص نشستوں سے محرومی کے بعد اراکین اسمبلی سے ایک بار پھر حلف وفاداری لینے کا فیصلہ کیا ہے ۔
میڈیا رپورٹس کے مطابق تحریک انصاف کی پارلیمانی پارٹی کا اجلاس کل اسلام آباد میں طلب کیا گیا جس میں وفاداری تبدیل ہونے کے خدشے کے پیش نظر اراکین اسمبلی سے ایک بار پھر وفاداری کا حلف لینے کا فیصلہ کیا ہے۔
ذرائع نے بتایا کہ تمام اراکین قومی اور صوبائی اسمبلی کو اسمبلی میں شرکت کی ہدایات جاری کی گئی ہیں ،اجلاس میں مخصوص نشستوں اور صوبے کی سیاسی صورتحال پر مشاورت کی جائے گی ۔
ذرائع کے مطابق پی ٹی آئی خیبر پختونخوا اسمبلی کے 35آزاد ارکان سے حلف نامہ لیا جائے گا، واضح رہے کہ پی ٹی آئی نے الیکشن کے بعد بھی ارکان اسمبلی سے حلف نامہ لیا تھا۔
واضح رہے کہ سپریم کورٹ کے حالیہ مخصوص نشستوں سے متعلق فیصلوں کے بعد ایوان میں پاکستان تحریک انصاف کی صورت حال کافی تبدیل ہوگئی ہے اور اب کے پی اسمبلی میں بھی اپوزیشن مضبوط ہے جس کو صرف 8 ووٹوں کی ضرورت ہے۔
پی ٹی آئی قیادت کو خدشہ ہے کہ سپریم کورٹ کے فیصلے کے بعد بالخصوص آزاد اراکین سے دیگر جماعتیں رابطہ کرسکتی ہیں، اسی کے پیش نظر اسلام آباد میں اجلاس طلب کیا گیا ہے۔
