ویب ڈیسک: بجلی قیمتوں میں 7روپے 41 پیسے کا ریلیف ختم ، آج سے میٹر دوبارہ پرانی ڈگر پر چلنے لگا ہے، یونٹ میں نرمی ختم کر کے عوام کو ایک اور مشکل میں ڈال دیا گیا ہے۔
تفصیلات کے مطابق وزیراعظم شہباز شریف کی جانب سے بجلی قیمتوں میں 7روپے 41 پیسے کمی کا ریلیف ختم کر دیا گیا ہے، گزشتہ سال اپریل میں وزیر اعظم نے 7 روپے 41 پیسے فی یونٹ بجلی سستی کرنے کا اعلان کیا تھا، ریلیف ختم ہونے کے بعد آج سے میٹر گزشتہ سال کی گرمیوں والی قیمت پر چلے گا۔
شہریوں نے شکوہ کیا ہے کہ حکومت کی جانب سے تو یہ تاثردیا گیا تھا کہ یہ کمی بجلی کے بنیادی ٹیرف میں کی گئی ہے مگر یہ تو عارضی ایڈجسٹمنٹ ثابت ہوئی ہے ، بجلی کی قیمت میں مستقل بنیادوں پر کمی کی جائے۔ دوسری جانب وفاقی وزیر پاور ڈویژن اویس لغاری کا کہنا ہے کہ حکومت نے مستقل ریلیف دیا ہے ، فیول ایڈجسٹمنٹ چارجز میں تبدیلی آتی ہے، باقی تبدیلی نہیں ہوگی۔
ادھر نیپرا سماعت میں پاور ڈویژن اورسنٹرل پاور پرچیزنگ ایجنسی کے حکام سے صارفین نے سوال کیا کہ کیا 7 روپے 41 پیسے کا ریلیف جاری رہے گا یا ختم ہوگیا؟ تو صارفین کے سوالات پر سنٹرل پاور پرچیزنگ ایجنسی نے جواب گول کرنے کی کوشش کی۔
ممبر نیپرا سندھ رفیق احمد شیخ کا کہنا تھا کہ جو سوال پوچھا گیا ہے سیدھا جواب دیں۔ نیپرا کی مداخلت کے باوجود سنٹرل پاور پرچیزنگ ایجنسی کے حکام واضح جواب نہ دے سکے۔ نیپرا حکام نے سنٹرل پاور پرچیزنگ ایجنسی کے جواب پر عدم اطمینان کا اظہار کیا۔
