ویب ڈیسک: سپریم کورٹ کے فیصلے پر عملدرآمد کرتے ہوئے الیکشن کمیشن نے اضافی مخصوص نشستوں پر اراکین کی رکنیت بحال کردی، نوٹیفکیشن جاری کردیا گیا۔
الیکشن کمیشن کے مطابق قومی اسمبلی میں خیبرپختونخوا کی خواتین کی 5 مخصوص نشستیں بحال کردی گئی ہیں، اس کے علاوہ قومی اسمبلی میں خیبرپختونخوا کی مسلم لیگ (ن) اور پیپلزپارٹی کو 2،2 جب کہ جے یو آئی کو ایک نشست ملی۔
پنجاب سے قومی اسمبلی میں خواتین کی 11مخصوص نشستیں بحال کی گئی ہیں جن میں سے 10 نشستیں مسلم لیگ (ن) اور ایک پیپلز پارٹی کو ملی۔ الیکشن کمیشن کے مطابق قومی اسمبلی میں اقلیتوں کی 3 نشستیں بحال کی گئی ہیں جن میں مسلم لیگ (ن)، پیپلزپارٹی اور جے یو آئی کو ایک ایک نشست ملی۔
اس کے علاوہ خیبرپختونخوا اسمبلی میں خواتین کی21 مخصوص نشستیں بحال کی گئی ہیں، جن میں جے یو آئی کو 8، (ن) لیگ کو 6 اور پیپلز پارٹی کو 5 جبکہ تحریک انصاف پارلیمنٹیرین اور اے این پی کو بھی ایک ایک مخصوص نشست ملی۔
ای سی پی کے مطابق خیبرپختونخوا اسمبلی میں اقلیتوں کی 4 نشستیں بحال کی گئی ہیں جن میں جے یو آئی کے حصے میں 2، (ن) لیگ اور پیپلزپارٹی کو ایک ایک نشست مل، پنجاب اسمبلی میں خواتین کی 24 مخصوص نشستیں بحال کی گئیں، جن میں 21 نشستیں (ن) لیگ، ایک پیپلزپارٹی، ایک استحکام پاکستان پارٹی اور ایک مسلم لیگ (ق) کو ملی۔
الیکشن کمیشن نے جنرل نشستوں پر کامیاب امیدواروں کو تحریک انصاف کا امیدوار قراردینے کا نوٹیفکیشن واپس لےلیا، یہ امیدوار قومی اسمبلی، پنجاب اسمبلی، خیبرپختونخوا اسمبلی، سندھ اسمبلی سے جنرل نشستوں پرکامیاب ہوئے تھے۔ یاد رہے کہ سپریم کورٹ کے فیصلے پر عملدرآمد کرتے ہوئے الیکشن کمیشن نے اضافی مخصوص نشستوں پر اراکین کی رکنیت بحال کردی، نوٹیفکیشن جاری کردیا گیا۔
