ویب ڈیسک: گورنر خیبرپختونخوا فیصل کریم کنڈی نے گنڈا پور حکومت کے خلاف تحریک عدم اعتماد لانے کا اشارہ دے دیا ہے ۔
نجی ٹی وی چینل سے گفتگو کرتے ہوئے گورنر فیصل کریم کنڈی کا کہنا تھا کہ خیبر پختونخوا اسمبلی میں اپوزیشن کے پاس 52یا 54 ارکان ہوچکے ہیں،جس دن اسمبلی میں ہمارا ایک بھی رکن زیادہ ہوا تو تحریک عدم اعتماد لا سکتے ہیں ۔
گورنر فیصل کریم کنڈی نے کہا کہ ہم وزیراعلیٰ علی امین گنڈا پور کے خلاف کوئی سازش نہیں کر رہے، پی ٹی آئی کے ڈائیلاگ ہم پہلے بھی سنتے تھے کہ جب عدم اعتماد کامیاب ہوا وہ سب کے سامنے تھا۔
انہوں نے کہا کہ اگرپی ٹی آئی کے پاس وفاق، پنجاب، بلوچستان اور سندھ میں زیادہ ارکان ہیں تو وہ عدم اعتماد لے آئے۔
گورنر خیبر پختونخوا کا مزید کہنا تھا کہ مولانا فضل الرحمان سے سیاسی ملاقاتیں کرتے رہتے ہیں، علیمہ خان کہتی ہیں کہ مولانا فضل الرحمان پی ٹی آئی کے خلاف کسی سیاسی کارروائی میں شامل نہیں ہوں گے، علیمہ خان تو مائنس عمران خان کا بھی کہہ چکی ہیں۔
