ویب ڈیسک: شکاگو کے علاقے ریور نارتھ کے ایک نائٹ کلب پر فائرنگ کے نتیجے میں 4افراد ہلاک جبکہ 14زخمی ہو گئے ۔
غیر ملکی میڈیا کے مطابق فائرنگ کا یہ واقعہ آرٹس ریسٹورنٹ اینڈ لانج کے باہر رات 11 بجے پیش آیاجہاں معروف ریپر میلو بکز (Mello Buckzz) کے میوزک البم کی تقریب رونمائی پر نامعلوم مسلح افراد نے حملہ کردیا۔
عینی شاہدین کا کہنا ہے کہ فائرنگ کے وقت کلب بند ہو رہا تھا اور بڑی تعداد میں لوگ باہر نکل رہے تھے کہ اس دوران حملہ آور مبینہ طور پر سیاہ رنگ کی ایک گاڑی میں آئے تھے اور ایک حملہ آور نے اندھا دھند فائرنگ کردی۔
حملے میں دو خواتین اور دو مرد ہلاک ہوگئے جب کہ 11 لڑکیاں اور 3 لڑکے زخمی ہیں 6 کی حالت نازک ہونے کے باعث ہلاکتوں میں اضافے کا خدشہ ہے۔
پولیس کا کہنا ہے کہ ابھی تک کوئی گرفتاری عمل میں نہیں لائی گئی، ہلاک اور زخمی ہونے والوں کی عمریں 22 سے 30 سال کے درمیان ہے۔
علاقے میں ریڈ الرٹ جاری کردیا گیا اور عوام سے سیاہ رنگ کی مشکوک گاڑی پر نظر رکھنے اور کوئی اطلاع ملنے پر فوری رابطے کی اپیل کی گئی ہے۔
