ویب ڈیسک: مشیر اطلاعات خیبر پختونخوا بیرسٹر محمد علی سیف نے کہا ہے کہ کربلا کا واقعہ دنیا میں حق اور سچائی کی سب سے بڑی مثال ہے۔
عاشورہ محرم کے حوالے سے اپنے پیغام میں مشیر اطلاعات بیرسٹر سیف کا کہنا تھا کہ واقعہ کربلا ہمیں سکھاتا ہے کہ حق کے لیے سر کٹایا جا سکتا ہے مگر جھکایا نہیں جا سکتا،کربلا ہر دور میں یزیدیت کے سامنے ڈٹ جانے کا سبق دیتا ہے۔
انہوں نے کہا کہ کوفہ کے لوگ بخوبی جانتے تھے کہ امام حسین حق پر ہے مگر یزید کے خوف سے امام حسین کی مدد نہیں کی اور بعد میں پچھتاتے رہے،بعد میں پچھتانے سے بہتر ہے کہ وقت پر یزیدیت کے خلاف ڈٹ کر کھڑے ہوجائے۔
بیرسٹر سیف کا کہنا تھا کہ امام حسین نے باطل کے سامنے نہ جھک کر سچائی کی لاج رکھی اور قیامت تک کے لیے حق کی پہچان بن گئے،کربلا کی زمین گواہ ہے کہ حق کے راستے پر چلنے والے کبھی تنہا نہیں ہوتے، ان کے ساتھ خدا ہوتا ہے۔
انہوں نے مزید کہا کہ سچ کی راہ اگرچہ مشکل ہے، مگر امام حسین نے کربلا میں یہ ثابت کر دیا کہ یہی راہ کامیابی کی ہے، یزید کے ظلم کے مقابل امام حسین کا قیام اس بات کی دلیل ہے کہ حق پر ڈٹے رہنے والا کبھی ناکام نہیں ہوتا۔
بیرسٹر سیف کا کہنا تھا کہ کربلا ہمیں بتاتا ہے کہ اگر سچائی کے لیے قربانی دینی پڑے، تو وہی قربانی تاریخ کا روشن باب بن جاتی ہے۔
