ویب ڈیسک: وزیر داخلہ وفاقی وزیر داخلہ محسن نقوی نے کہا ہے کہ پہلی بار حکومت ، ملٹری سٹیبلشمنٹ اور سیاستدان اکٹھے ہیں تو کچھ لوگوں کو تکلیف ہورہی ہے ۔
سکھر میں میڈیا سے گفتگو کے دوران صدر مملکت آصف علی زرداری کو ہٹائے جانے سے متعلق خبروں پر رد عمل دیتے ہوئے وزیرداخلہ محسن نقوی کا کہنا تھا کہ تاریخ میں پہلی دفعہ سیاستدان، حکومت اورملٹری اسٹیبلشمنٹ اکٹھی ہے تو کچھ لوگوں کو تکلیف ہوتی ہے۔
انہوں نے کہا کہ ملک بھر میں 2700 جلوس نکالے جا رہے ہیں، سکھر میں آج پاکستان کا سب سے بڑا جلوس نکالا جارہا ہے،پاکستان کے سب سے بڑے جلوس کو ہینڈل کرنے کا کریڈٹ پوری ٹیم کو جاتا ہے۔
اس موقع پر ایک صحافی نے سوال کیا کہ افواہیں کہ آصف زرداری کو صدر کے عہدے سے ہٹایا جارہا ہے اورنئی ترمیم لائی جارہی ہے؟جس پر محسن نقوی نے جواب دیا کہ میری درخواست ہے کہ 2 دن سیاست نہ کریں توبہت اچھی بات ہے، سوشل میڈیا کی خبروں پربالکل یقین نہ کریں، بعض لوگوں کو تکلیف ہے کہ ہم سب اکٹھے کیوں ہیں۔
انہوں نے مزید کہا کہ پہلی دفعہ سیاستدان، حکومت اورملٹری اسٹیبلشمنٹ اکٹھے ہیں تو کچھ لوگوں کو تکلیف ہوتی ہے، سب اکٹھے ہیں اس لیے جن لوگوں کو تکلیف ہورہی ہے وہ ایسی باتیں کررہے ہیں۔
صحافی کی جانب سے سوال کیا گیا کہ کیا سندھ کے اضلاع شکارپور، کشمور، کندھ کوٹ کے حالات کی اطلاع وفاقی حکومت کو نہیں ہے؟اس پر جواب دیتے ہوئے انہوں نے کہا کہ ہمیں اطلاع ہے اور جس طرح خیبر پختونخوا میں دہشت گردوں کومار بھگایا ہے اسی طرح ڈاکوئوں کا بھی بندوبست کرلیں گے۔
