ویب ڈیسک(اسلام آباد) کورونا وائرس کی بگڑتی صورتحال این سی او سی نے بیرون ممالک سے پاکستان آنے والے مسافروں کے لئے ایڈوائزری جاری کردی۔
نیشنل کمانڈ اینڈ آپریشن سینٹر(این سی او سی) کے مطابق پاکستان آنے والی ائر ٹریفک کو 80 فیصد تک کم کرنے کی ہدایت کی گئی ہے بیرون ملک سے پاکستان میں ائر ٹریفک کو 20 فیصد تک محدود رکھنے کا فیصلہ کیا گیا ہے۔
فضائی سفر محدود رکھنے کی پابندیاں 4 سے 20 مئی تک نافذ العمل رہیں گی۔
این سی او سی کے مطابق 18 مئی کو موجودہ پابندیوں کے منصوبے کا ازسرنو جائزہ لیا جائے گا جبکہ پاکستان آنے والے مسافروں کو 72 گھنٹے قبل پی سی آر منفی ٹیسٹ رپورٹ دکھانا لازم ہو گا۔
مسافروں کی پاکستان آمد پر ائرپورٹ پر دوبارہ پی سی آر ٹیسٹ کیا جائے گا اور این ڈی ایم اے انٹرنیشنل ائرپورٹس پر پی سی آر ٹیسٹ کٹس کی فراہمی یقینی کی پابند ہو گی۔
مسافروں کا ٹیسٹ منفی ہونے پر 10 دن قرنطینہ کرنے کے پابند ہوں گے جبکہ مثبٹ رپورٹ پر مسافر کو ضلعی انتظامیہ کے زیر انتظام قرنطینہ سینٹر بھیجا جائے گا۔
بیرون ملک سے آنے والے مسافروں کی فاسٹ ٹریک ایپ میں رجسٹریشن لازمی قراردی گئی ہے۔ ملک بدر کیے گئے پاکستانی فاسٹ ٹریک ایپ کی رجسٹریشن سے مستثٰنی ہوں گے۔
این سی او سی نے سول ایوی ایشن اور پی آئی اے کو ریوائزڈ ائر ٹریفک پلان بنانے کی ہدایت کر دی جبکہ تمام انٹرنیشنل ائر پورٹس پر محکمہ صحت کے عملہ کی 24 گھنٹے موجودگی کو یقینی بنایا جائے گا۔
ایوی ایشن ڈویژن اور ائر پورٹ مینجمنٹ ٹیسٹنگ کے لیے محکمہ صحت کو سہولیات فراہم کریں گے این سی او سی نے وزارت خارجہ، داخلہ، سول ایوی ایشن سمیت تمام صوبائی چیف سیکرٹریز کو مراسلہ ارسال کر دیا۔
